ചെന്നൈ: 600 കോടി രൂപയുടെ തട്ടിപ്പ് കേസില്‍ ബിജെപി നേതാക്കളായ സഹോദരങ്ങള്‍ അറസ്റ്റില്‍. 'ഹെലികോപ്റ്റര്‍ സഹോദരങ്ങള്‍' 
എന്നറിയപ്പെടുന്ന എം ആര്‍ ഗണേഷ്, എം ആര്‍ സ്വാമിനാഥന്‍ എന്നിവരാണ് പിടിയിലായത്. പണമിരട്ടിപ്പ് വാഗ്ദാനത്തിലൂടെ വന്‍ തട്ടിപ്പ് നടത്തിയ ഇവരെ വ്യാഴാഴ്ച പുതുക്കോട്ടയില്‍ നിന്നാണ് കസ്റ്റഡിയിലെടുത്തത്.

ബിജെപി വ്യാപാരി സംഘടന വിഭാഗം ഭാരവാഹികളാണിവര്‍. 15 കോടി രൂപയുടെ നിക്ഷേപം നടത്തി വഞ്ചിതരായ ദുബൈയിലെ വ്യാപാരികളായ ജാഫറുല്ല ഫൈറോസ്ബാനു ദമ്പതികള്‍ നല്‍കിയ പരാതിയില്‍ തഞ്ചാവൂര്‍ ജില്ലാ ക്രൈംബ്രാഞ്ച് കേസെടുത്തതോടെയാണ് ഇവര്‍ മുങ്ങിയത്. 

പിന്നീട് നിരവധി നിക്ഷേപകരും പൊലീസില്‍ പരാതി നല്‍കി. തുടര്‍ന്ന് പ്രതികളുടെ വസതികളിലും ധനകാര്യ സ്ഥാപനത്തിലും റെയ്ഡ് നടന്നു. 12 ആഡംബര കാറുകളും പണമിടപാടുമായി ബന്ധപ്പെട്ട നിരവധി രേഖകളും പിടിച്ചെടുത്തു. ഫിനാന്‍സ് കമ്പനി മാനേജരായ ശ്രീകാന്തും ഗണേഷിന്റെ ഭാര്യയും ഉള്‍പ്പെടെ അഞ്ച് പേരെ അറസ്റ്റ് ചെയ്യുകയും ചെയ്തിരുന്നു.