ന്യൂഡൽഹി: കാർഷിക നിയമത്തിനെതിരെ ട്രാക്ടർ പരേഡിനായി എത്തിയ കർഷകർ ഡൽഹിയിൽ നിന്ന് അതിർത്തികളിലേക്ക് മടങ്ങിപ്പോകണമെന്ന് പഞ്ചാബ് മുഖ്യമന്ത്രിയും കോൺ​ഗ്രസ് നേതാവുമായ അമരീന്ദർ സിങ്. ഡൽഹിയിലുണ്ടായ സംഭവങ്ങൾ ഞെട്ടിക്കുന്നതാണെന്നും ചിലർ സ്വീകരിക്കുന്ന അക്രമ മാർ​ഗങ്ങൾഅം​ഗീകരിക്കാൻ സാധിക്കുന്നതല്ലെന്നും അദ്ദേഹം പറഞ്ഞു.

'‍ഡൽഹിയിലെ സംഭവങ്ങൾ ഞെട്ടിപ്പിക്കുന്നതാണ്. സമാധാനപരമായി നടക്കേണ്ട പ്രതിഷേധത്തിൽ ചില സംഘടനകൾ സ്വീകരിക്കുന്ന അക്രമം അം​ഗീകരിക്കാൻ സാധിക്കുന്നതല്ല. സമാധാനപരമായി കർഷകർ സൃഷ്ടിക്കുന്ന പ്രതിഷേധത്തെ ഇത് നിരാകരിക്കും. ട്രാക്ടർ റാലി അവസാനിച്ചതായി കിസാൻ നേതാക്കക്കൾ തന്നെ സ്ഥിരീകരിച്ചിട്ടുണ്ട്. അതിനാൽ എല്ലാ യഥാർത്ഥ കർഷകരോടും ഡൽഹി വിട്ട് അതിർത്തികളിലേക്ക് മടങ്ങാൻ ഞാൻ അഭ്യർത്ഥിക്കുന്നു'- പഞ്ചാബ് മുഖ്യമന്ത്രി വ്യക്തമാക്കി.

സംഭവത്തിൽ ആം ആദ്മി പാർട്ടിയും പ്രതിഷേധിച്ചു. സമാധാനപരമായി നടക്കേണ്ട സമരം ഇത്തരത്തിൽ ആയത് അം​ഗീകരിക്കാൻ സാധിക്കില്ല. സ്ഥിതി​ഗതികൾ ഇത്ര വഷളാകാൻ കാരണം കേന്ദ്ര സർക്കാരിന്റെ പിടിപ്പുകേടാണ്. രണ്ട് മാസമായി സമാധാനപരമായി നടക്കുന്ന സമരം ആക്രമണത്തിലേക്ക് വഴി മാറിയത് ഖേദകരമാണെന്നും എഎപി പ്രസ്താവനയിൽ വ്യക്തമാക്കി.