പൂനെ: സിനിമയിൽ അഭിനയിക്കാൻ അവസരം വാഗ്ദ്ധാനം ചെയ്ത് 25കാരിയായ മോഡലിനെ ലൈംഗികമായി ചൂഷണം ചെയ്ത കേസിൽ സിനിമാ നിർമാതാവ് ഉൾപ്പെടെ അറസ്റ്റിൽ. കേസിൽ മൂന്ന് പേരാണ് അറസ്റ്റിലായിരിക്കുന്നത്. മഹാരാഷ്ട്രയിലെ പൂനെ ഹദാസ്പർ സ്വദേശിയുടെ പരാതിയിലാണ് അറസ്റ്റ്. പ്രതിക്കൾക്കെതിരെ ബലാത്സംഗകുറ്റത്തിന് കേസെടുത്തു.

2017 ജൂലൈയിലാണ് പരാതിക്കാസ്പദമായ സംഭവം. ഒരുവർഷത്തോളം ലൈംഗിക ചൂഷണം നടന്നതായി പൊലീസ് പറഞ്ഞു. സിനിമയിൽ അവസരം നൽകാമെന്ന് പറഞ്ഞ് ആറരലക്ഷം രൂപയോളം ഇവർ മുൻപ് കൈപറ്റിയിട്ടുണ്ടെന്നുമം പരാതിക്കാരി ആരോപിച്ചു.

ഷോർട്ട് ഫിലിമിന്റെ ചിത്രീകരണത്തിനിടെയാണ് സിനിമാ നിർമാണ മേഖലയിൽ പ്രവർത്തിക്കുന്ന പ്രതികളിൽ ഒരാളെ പരിചയപ്പെട്ടത്. സിനിമയിൽ വേഷം വാഗ്ദ്ധാനം ചെയ്ത ശേഷം അയാൾ ലൈംഗികമായി ചൂഷണം ചെയ്യുകയായിരുന്നു. പരാതിക്കാരിയോടൊപ്പം ഫോട്ടോഷൂട്ട് നടത്തിയ പ്രതികൾ അവളുടെ ചിത്രങ്ങൾ സാമൂഹിക മാദ്ധ്യമങ്ങളിൽ പ്രചരിപ്പിക്കുമെന്ന് ഭീഷണിപ്പെടുത്തി 10 ലക്ഷം രൂപ തട്ടിയെടുക്കാനും ശ്രമിച്ചു.