ന്യൂഡൽഹി: പശ്ചിമ ബംഗാൾ നിയമസഭാ തെരഞ്ഞെടുപ്പിലെ പരാജയത്തിന് പിന്നാലെ തൃണമൂൽ കോൺഗ്രസ് പാർലമെന്ററി പാർട്ടിയിൽ മമത ബാനർജിയുടെയും അനന്തരവൻ അഭിഷേക് ബാനർജിയുടെയും നേതൃത്വത്തെ പൂർണ്ണമായി തള്ളിക്കൊണ്ട് വൻ പിളർപ്പ്. ആകെയുള്ള ഇരുപത്തിയെട്ടിൽ ഇരുപത് (20/28) തൃണമൂൽ കോൺഗ്രസ് എം.പിമാർ പാർട്ടി ബന്ധം പൂർണ്ണമായി ഉപേക്ഷിച്ച് ബി.ജെ.പി നേതൃത്വം നൽകുന്ന ഭരണകക്ഷിയായ എൻഡിഎയുടെ (NDA) ഭാഗമാകാൻ ഔദ്യോഗികമായി തീരുമാനിച്ചു. മുതിർന്ന പാർട്ടി നേതാവ് കക്കോലി ഘോഷ് ദസ്തിദാറുടെ നേരിട്ടുള്ള നേതൃത്വത്തിലാണ് വിമത എം.പിമാരുടെ ഈ നീക്കം നടന്നിരിക്കുന്നത്. തങ്ങൾ ഇനി മുതൽ ബി.ജെ.പി നയിക്കുന്ന എൻ.ഡി.എ മുന്നണിയുടെ ഭാഗമാകാൻ ആഗ്രഹിക്കുന്നുവെന്നും തൃണമൂൽ ദേശീയ ജനറൽ സെക്രട്ടറി അഭിഷേക് ബാനർജിയുടെ നേതൃത്വത്തിലുള്ള പാർലമെന്ററി പാർട്ടി യുമായുള്ള ബന്ധം പൂർണ്ണമായി വേർപെടുത്തുകയാണെന്നും വ്യക്തമാക്കി ഇരുപത് വിമത എം.പിമാർ ഒപ്പിട്ട കത്ത് ലോക്സഭാ സ്പീക്കർ ഓം ബിർളയ്ക്ക് സമർപ്പിച്ചു കഴിഞ്ഞു. മമത ബാനർജിയും അഭിഷേക് ബാനർജിയും പ്രതിപക്ഷ സഖ്യമായ ‘ഇന്ത്യ’ മുന്നണി യോഗത്തിൽ പങ്കെടുക്കാനായി ഡൽഹിയിൽ ഉള്ളപ്പോൾ തന്നെയാണ് കേന്ദ്ര ഭരണകൂടത്തെ സാക്ഷിയാക്കി ഈ നിർണ്ണായക അട്ടിമറി അരങ്ങേറിയത്.

കേന്ദ്രമന്ത്രിയും മുതിർന്ന ബിജെപി നേതാവുമായ ഭൂപേന്ദർ യാദവിന്റെ ഡൽഹിയിലെ ഔദ്യോഗിക വസതിയിൽ വെച്ച് നടന്ന അതീവ രഹസ്യ സ്വഭാവമുള്ള യോഗത്തിലാണ് പാർട്ടി പിളർത്താനുള്ള അന്തിമ തീരുമാനം വിമതർ കൈക്കൊണ്ടത്. ഡൽഹിയിലുള്ള പശ്ചിമ ബംഗാൾ മുഖ്യമന്ത്രി സുവേന്ദു അധികാരിയും കേന്ദ്രമന്ത്രിയുടെ വസതിയിലെത്തി വിമത എംപിമാരുമായി നേരിട്ട് കൂടിക്കാഴ്ച നടത്തുകയും തുടർനടപടികൾക്ക് പൂർണ്ണ പിന്തുണ അറിയിക്കുകയും ചെയ്തു. യോഗത്തിന് ശേഷം മാധ്യമങ്ങളോട് സംസാരിച്ച ബർധമാൻ പുർബയിൽ നിന്നുള്ള തൃണമൂൽ വിമത എം.പി ശർമ്മിള സർക്കാർ, ഇക്കാര്യം സ്ഥിരീകരിച്ചു. തങ്ങൾ പ്രത്യേക യോഗം ചേർന്നുവെന്നും സഭയിൽ ഇനി മുതൽ തൃണമൂലിൽ നിന്നും മാറി പ്രത്യേക ബ്ലോക്കായി ഇരിക്കാനാണ് തീരുമാനമെന്നും അവർ പറഞ്ഞു. തനിക്ക് ദിദിയോട് (മമത ബാനർജി) വലിയ ബഹുമാനമുണ്ട്. എന്നാൽ ജനങ്ങൾക്കായി പ്രവർത്തിക്കാൻ താൻ ആഗ്രഹിച്ചിരുന്നെങ്കിലും നിലവിലെ സാഹചര്യത്തിൽ അതിന് സാധിച്ചിരുന്നില്ല. കക്കോലി ദിയുടെ നേതൃത്വത്തിലാണ് ഈ പുതിയ പ്രത്യേക ബ്ലോക്ക് രൂപീകരിച്ചിട്ടുള്ളത്. ഇത് ബംഗാളിന്റെ വികസനത്തിന് വലിയ രീതിയിൽ സഹായിക്കുമെന്നും ശർമ്മിള സർക്കാർ കൂട്ടിച്ചേർത്തു.

രഹസ്യ യോഗത്തിൽ പങ്കെടുത്ത എംപിമാർ തങ്ങളുടെ ഭാവി രാഷ്ട്രീയ നീക്കങ്ങളെക്കുറിച്ചും പാർലമെന്റിലെ നിലവിലെ തൃണമൂൽ നേതൃത്വത്തിന്റെ പ്രവർത്തന ശൈലികളോടുള്ള തങ്ങളുടെ വിയോജിപ്പും തുറന്നുപറഞ്ഞു. തെരഞ്ഞെടുപ്പ് പരാജയത്തിന്റെ യഥാർത്ഥ കാരണങ്ങൾ അന്വേഷിക്കാനോ അത് അംഗീകരിക്കാനോ പാർട്ടി നേതൃത്വം തയ്യാറാകുന്നില്ലെന്നാണ് ഇവരുടെ പ്രധാന ആക്ഷേപം. അതേസമയം ഈ രഹസ്യയോഗത്തിൽ പങ്കെടുത്ത വിവരങ്ങൾ പുറത്തുവന്നതിന് പിന്നാലെ ചില എം.പിമാർ ഡൽഹിയിലെ ഒരു കേന്ദ്ര സർക്കാർ ഓഫീസിൽ വെച്ചും തിങ്കളാഴ്ച തുടർചർച്ചകൾ നടത്തിയതായി റിപ്പോർട്ടുകളുണ്ട്. യോഗത്തിന്റെ ഒരു ചിത്രം തിങ്കളാഴ്ച സാമൂഹിക മാധ്യമങ്ങളിൽ പ്രചരിച്ചതോടെയാണ് സംഭവം പുറംലോകം അറിഞ്ഞത്. യോഗത്തിൽ പങ്കെടുത്ത ഒരാൾ മറ്റുള്ളവരുടെ അനുവാദമില്ലാതെ എടുത്ത ചിത്രമാണിതെന്നും ഇത് അവിടെ ചെറിയ തർക്കത്തിന് കാരണമായെന്നും പറയപ്പെടുന്നു.

തങ്ങൾ ഇരുപത് എംപിമാർ ഒത്തൊരുമിച്ചാണ് ഈ തീരുമാനമെടുത്തതെന്നും മുഖ്യമന്ത്രി സുവേന്ദു അധികാരിയുടെ സാന്നിധ്യത്തിൽ ഭൂപേന്ദർ യാദവിന്റെ വസതിയിൽ വെച്ചാണ് യോഗം പൂർത്തിയാക്കിയതെന്നും ശർമ്മിള സർക്കാർ വ്യക്തമാക്കി. ബംഗാളിന്റെ യഥാർത്ഥ വികസനത്തിനായി തങ്ങൾക്ക് കേന്ദ്രത്തിലെ എൻ.ഡി.എ മുന്നണിയെ പിന്തുണയ്ക്കേണ്ടതുണ്ട്. കക്കോലി ദിയാണ് നിലവിൽ സ്പീക്കർക്ക് കത്ത് നൽകിയതെന്നും നേരത്തെ ബംഗാൾ നിയമസഭയിൽ 58 എം.എൽ.എമാർ ഒപ്പിട്ട് നൽകിയ കത്തിന്റെ അടിസ്ഥാനത്തിൽ ഔദ്യോഗിക നാമനിർദ്ദേശത്തെ മറികടന്ന് ഋതബ്രത ബാനർജി പ്രതിപക്ഷ നേതാവായി സ്പീക്കറുടെ അംഗീകാരം നേടിയിരുന്നു. അതിന് തൊട്ടുപിന്നാലെയാണ് ഇപ്പോൾ ഡൽഹിയിലും മമതയെ ഞെട്ടിച്ചുകൊണ്ട് പാർലമെന്ററി പാർട്ടിയിൽ ഇരുപത് എം.പിമാർ കക്കോലി ഘോഷ് ദസ്തിദാറുടെ നേതൃത്വത്തിൽ സ്പീക്കർക്ക് നേരിട്ട് കത്ത് നൽകിയിരിക്കുന്നത്.

അതിനിടെ, തൃണമൂൽ കോൺഗ്രസിനെ കൂടുതൽ പ്രതിസന്ധിയിലാക്കിക്കൊണ്ട് മുതിർന്ന രാജ്യസഭാ എംപി സുഖേന്ദു ശേഖർ റോയ് തിങ്കളാഴ്ച പാർട്ടിയിൽ നിന്നും എംപി പദവിയിൽ നിന്നും ഔദ്യോഗികമായി രാജിവെച്ചു. സംസ്ഥാന ഭരണത്തിലും സംഘടനയ്ക്കുള്ളിലും നടക്കുന്ന വലിയ രീതിയിലുള്ള അഴിമതികൾ ചൂണ്ടിക്കാണിച്ചാണ് അദ്ദേഹത്തിന്റെ രാജി. പാർട്ടിക്ക് എതിരെ ജനരോഷം ഉയർന്നുവന്നിരിക്കുകയാണെന്നും അദ്ദേഹം തുറന്നടിച്ചു. ഞായറാഴ്ചത്തെ യോഗത്തിൽ റോയ് പങ്കെടുത്തിരുന്നു. അതേസമയം കൂട്ടത്തോടെയുള്ള പാർട്ടി മാറ്റത്തിനുള്ള സാധ്യതകളെ തള്ളിക്കൊണ്ട് മുതിർന്ന തൃണമൂൽ എം.പി സൗഗത റോയ് രംഗത്തെത്തി. ചില എം.പിമാർ പ്രത്യേക യോഗം ചേർന്നതായി താൻ അറിഞ്ഞിട്ടുണ്ടെന്നും എന്നാൽ തന്നെ അവർ ബന്ധപ്പെട്ടിട്ടില്ലെന്നും അദ്ദേഹം പറഞ്ഞു. ബി.ജെ.പി തന്നെയും പാർട്ടിയിലേക്ക് ക്ഷണിച്ചുകൊണ്ട് ബന്ധപ്പെട്ടിരുന്നുവെന്നും എന്നാൽ ഈ എഴുപത്തിയെട്ടാം വയസ്സിൽ മറ്റൊരു ചേരിയിലേക്ക് മാറാൻ താൻ തയ്യാറല്ലെന്ന് വ്യക്തമാക്കിയതായും സൗഗത റോയ് കൂട്ടിച്ചേർത്തു.