ശ്രീനഗര്‍: ജമ്മുകശ്മീരില്‍ ഏറ്റുമുട്ടലില്‍ രണ്ടു ഭീകരരെ സൈന്യം വധിച്ചു. ഷോപ്പിയാനിലാണ് സംഭവം. അതിനിടെ പഞ്ചാബിലെ ഫിറോസ്പൂരില്‍ ബിഎസ്എഫ് വന്‍ ആയുധശേഖരം പിടിച്ചെടുത്തു.

ജമ്മു കശ്മീരില്‍ കഴിഞ്ഞ ഏതാനും ദിവസങ്ങളായി ഭീകരര്‍ക്കെതിരെ സുരക്ഷാ സേന കര്‍ക്കശ നിലപാടാണ് സ്വീകരിച്ചുവരുന്നത്. കഴിഞ്ഞ ദിവസങ്ങളില്‍ 11 ഏറ്റുമുട്ടലുകളിലായി 9 ഭീകരരെ വധിച്ചതായി സുരക്ഷാ സേന അറിയിച്ചിരുന്നു. ഭീകരര്‍ക്ക് വേണ്ടിയുള്ള തെരച്ചിലിനിടെ ഉണ്ടായ ഏറ്റുമുട്ടലിലാണ് രണ്ടു ഭീകരരെ ഇന്ന് വധിച്ചത്.

അതിനിടെ പഞ്ചാബില്‍ രാജ്യാന്തര അതിര്‍ത്തി സമീപത്ത് നിന്ന് ആയുധങ്ങളും മയക്കുമരുന്നും പിടിച്ചെടുത്തു. പാകിസ്ഥാന്‍ നിര്‍മ്മിത ആയുധങ്ങളാണ് ഫിറോസ്പൂരില്‍ നിന്ന് ബിഎസ്എഫ് പിടിച്ചെടുത്തത്. ആയുധങ്ങള്‍ അടങ്ങിയ ബാഗില്‍ ഹെറോയിന്‍ ഉള്‍പ്പെടെയുള്ള മയക്കുമരുന്നും കണ്ടെത്തിയെന്നാണ് റിപ്പോര്‍ട്ട്.