ന്യൂഡല്‍ഹി:രാജ്യതലസ്ഥാനമായ ഡല്‍ഹിയില്‍ കഴിഞ്ഞ ഏതാനും ദിവസങ്ങളായി കനത്തമഴയാണ് പെയ്യുന്നത്.  ബുധനാഴ്ച രാവിലെ 8.30 വരെയുള്ള 24 മണിക്കൂറിനിടെ റെക്കോര്‍ഡ് മഴയാണ് പെയ്തിറങ്ങിയത്. സെപ്റ്റംബറില്‍ 12 വര്‍ഷത്തിനിടയിലെ കനത്ത മഴയാണ് ഇന്ന് രേഖപ്പെടുത്തിയത്.112.1 മില്ലിമീറ്റര്‍ മഴ ലഭിച്ചതായി കാലാവസ്ഥ വകുപ്പ് അറിയിച്ചു.

കനത്തമഴയില്‍ ഡല്‍ഹിയില്‍ ജനജീവിതം തടസ്സപ്പെട്ടു. റോഡുകളും താഴ്ന്ന പ്രദേശങ്ങളും വെള്ളത്തിന്റെ അടിയിലായി. റോഡുകളില്‍ വെള്ളക്കെട്ട് അനുഭവപ്പെട്ടതോടെ മണിക്കൂറുകളോളം ഗതാഗത കുരുക്ക് അനുഭവപ്പെട്ടു. അതിനിടെ ഡല്‍ഹിയിലെ മഴയുടെ നിരവധി ചിത്രങ്ങളും വീഡിയോകളുമാണ് പുറത്തുവന്നത്.

ഡല്‍ഹി ഫ്‌ളൈഓവറില്‍ നിന്നുള്ള ദൃശ്യമാണ് ഇപ്പോള്‍ വൈറലാകുന്നത്. ഫ്‌ളൈ ഓവറില്‍ നിന്ന് വെള്ളച്ചാട്ടത്തിന് സമാനമായി താഴത്തെ റോഡിലേക്ക് വെള്ളം പുറത്തേയ്ക്ക് ഒഴുകുന്ന കാഴ്ചയാണ് സമൂഹമാധ്യമങ്ങളില്‍ വ്യാപകമായി പ്രചരിക്കുന്നത്. ഡല്‍ഹിയിലെ നയാഗ്ര വെള്ളച്ചാട്ടമാണോ എന്നെല്ലാം ചോദിച്ച് നിരവധി കമന്റുകളാണ് പ്രത്യക്ഷപ്പെടുന്നത്.