ലഖ്‌നൗ: ഡ്രൈവിങ് മിടുക്ക് കാണിക്കാന്‍ ശ്രമിച്ചതിന് എട്ടിന്റെ പണികൊടുത്ത് ട്രാഫിക് പൊലീസ്. മാരുതി സുസുക്കി ബലേനോ കാര്‍ അതിവേഗത്തില്‍ റോഡില്‍ അഭ്യാസം കാണിക്കുന്നതിന്റെ വിഡിയോ സോഷ്യല്‍ മീഡിയയില്‍ വൈറലാണ്. മറ്റൊരു കാറില്‍ നിന്നുമെടുത്ത ദൃശ്യമാണ് പുറത്തു വന്നിരിക്കുന്നത്. വിഡിയോയുടെ അവസാനം ട്രാഫിക് പൊലീസ് 57,500 രൂപ ഫൈന്‍ അടിച്ചു നല്‍കിയതും കാണുന്നുണ്ട്. ഗ്രേറ്റര്‍ നോയിഡയിലാണ് സംഭവം.

പിന്നാലെ വരുന്ന കാറിന് മുമ്പില്‍ അഭ്യാസം കാണിക്കുന്നതാണ് വിഡിയോയുടെ ആദ്യ ഭാഗത്തുള്ളത്. നടുറോഡില്‍ നിന്നും കാര്‍ പെട്ടെന്ന് തെന്നിമാറി വട്ടംകറങ്ങി റോഡരികില്‍ നിര്‍ത്തുന്നു. അടുത്ത സീനില്‍ അതേ കാര്‍ വീണ്ടും അഭ്യാസ പ്രകടനം നടത്തി ഒരു റെസിഡന്‍ഷ്യല്‍ ഏരിയയില്‍ നിര്‍ത്തുന്നു. അശ്രദ്ധയോടെ അപകടകരമായ ഡ്രൈവിങ് നടത്തിയതിനാണ് പിഴ ചുമത്തിയിരിക്കുന്നത്.

വിഡിയോ പോസ്റ്റ് ചെയ്തതോടെ ഉത്തരവാദിത്തപരമായ ഡ്രൈവിങിനെക്കുറിച്ചും അശ്രദ്ധമായ പെരുമാറ്റത്തിന്റെ അനന്തരഫലങ്ങളെക്കുറിച്ചും ചര്‍ച്ചകള്‍ തുടങ്ങി. പിന്നീട് വിഡിയോ വൈറലാവുകയും ചെയ്തു. ചെലവേറിയ ഫണ്ടാണല്ലോ എന്നാണ് ഒരാള്‍ അഭിപ്രായപ്പെട്ടത്.

ആല്‍ഫ 2 മാര്‍ക്കറ്റില്‍ എല്ലാ ദിവസവും ഇതുപോലുള്ള ഡ്രൈവര്‍മാരെ കാണാറുണ്ടെന്നും ഇത് അവര്‍ക്ക് ഒരു ദൈനംദിന കാര്യമാണെന്നും മറ്റൊരാള്‍ കുറിച്ചു. ഗതാഗത നിയമങ്ങളെ ഒരുവ തമാശയായിട്ടാണ് ഇത്തരം ആളുകള്‍ കാണുന്നതെന്ന് തോന്നുന്നു. യുപിയിലുടനീളം ഇതേപ്രശ്‌നമാണെന്ന് തോന്നുന്നു. മുമ്പ് ബംഗളൂരുവില്‍ താമസിച്ചിരുന്നു. അവിടെ ഇത്രയും അശ്രദ്ധമായി വാഹനമോടിക്കുന്നത് ഒരിക്കലും കണ്ടിട്ടില്ലെന്നുമാണ് ഒരാള്‍ കമന്റ് ചെയ്തിരിക്കുന്നത്. പിഴയല്ല വേണ്ടത്, വാഹനം പിടിച്ചെടുത്ത് വടികൊണ്ട് നല്ല തല്ല് കൊടുക്കുകയാണ് വേണ്ടതെന്നാണ് മറ്റൊരു കമന്റ്.