ന്യൂഡല്‍ഹി: ലോക്‌സഭാ തെരഞ്ഞെടുപ്പില്‍ അന്‍പതു ശതമാനം വോട്ടു രശീതി (വിപിപാറ്റ്) എണ്ണണമെന്ന ആവശ്യം തള്ളിയ സുപ്രീം കോടതി വിധിക്കെതിരെ 21 പ്രതിപക്ഷ പാര്‍ട്ടികള്‍ പുനപ്പരിശോധനാ ഹര്‍ജി ഫയല്‍ ചെയ്തു. വോട്ടിങ് യന്ത്രങ്ങളെക്കുറിച്ച് വ്യാപകമായി ഉയര്‍ന്ന പരാതി ചൂണ്ടിക്കാട്ടിയാണ് സിപിഎം ഉള്‍പ്പെടെയുള്ള പാര്‍ട്ടികളുടെ നടപടി.

തെരഞ്ഞെടുപ്പില്‍ എല്ലാ മണ്ഡലങ്ങളിലും അഞ്ചു വോട്ടിങ് യന്ത്രങ്ങളിലെ വോട്ടു രശീതി എണ്ണണമെന്നാണ് ഏപ്രില്‍ എട്ടിനു പുറപ്പെടുവിച്ച വിധിയില്‍ സുപ്രിം കോടതി നിര്‍ദേശിച്ചത്. 50 ശതമാനം വിവിപാറ്റ് രശീതികള്‍ എണ്ണണമെന്ന് ആവശ്യപ്പെട്ട് പ്രതിപക്ഷ പാര്‍ട്ടികള്‍ നല്‍കിയ ഹര്‍ജിയിലാണ് ചീഫ് ജസ്റ്റിസ് രഞ്ജന്‍ ഗൊഗോയിയുടെ നേതൃത്വത്തിലുള്ള ബെഞ്ചിന്റെ വിധി. 

അന്‍പതു ശതമാനം വിവിപാറ്റ് എണ്ണുകയെന്നത് പ്രായോഗികമല്ലെന്ന വാദമാണ് തെരഞ്ഞെടുപ്പു കമ്മിഷന്‍ സുപ്രിം കോടതിയില്‍ സ്വീകരിച്ചത്. ഒരു ശതമാനം വിവിപാറ്റ് എണ്ണാന്‍ ഒരു മണിക്കൂര്‍ സമയം വേണമെന്നും അന്‍പതു ശതമാനം എണ്ണുന്നതിലൂടെ ഫലപ്രഖ്യാപനം ദിവസങ്ങള്‍ നീളുമെന്നും കമ്മിഷന്‍ നിലപാടെടുത്തു. എന്നാല്‍ ഫലപ്രഖ്യാപനം വൈകിയാലും വിശ്വാസ്യത ഉറപ്പുവരുത്തിയാവണം തെരഞ്ഞെടുപ്പ് എന്നായിരുന്നു പ്രതിപക്ഷ പാര്‍ട്ടികളുടെ വാദം.