മുംബൈ: മഹാരാഷ്ട്രയില്‍ ലോക്‌സഭാ തെരഞ്ഞടുപ്പില്‍ ബിജെപി - ശിവസേന സഖ്യമായി മത്സരിക്കും. നാല്‍പ്പത്തിയെട്ട് സീറ്റകളുള്ള സംസ്ഥാനത്ത് 25 സീറ്റുകളില്‍ ബിജെപിയും 23 സീറ്റുകളില്‍ ശിവസേനയും മത്സരിക്കുമെന്നാണ് റിപ്പോര്‍ട്ടുകള്‍.

ബിജെപി ദേശീയ അധ്യക്ഷന്‍ അമിത് ഷായും ശിവസേന അധ്യക്ഷന്‍ ഉദ്ധവ് താക്കറയും കഴിഞ്ഞ ദിവസം ഫോണിലൂടെ സഖ്യചര്‍ച്ചകള്‍ നടത്തിയിരുന്നു. ലോക്‌സഭയില്‍ 50-50 ഫോര്‍മുലയില്‍ മത്സരിക്കാമെന്ന് സേനാ നേതൃത്വത്തെ അറിയിച്ചിരുന്നു. നിയമസഭയിയിലും സമാനമായ ഫോര്‍മുല ആകാമെന്നും ബിജെപി നേതാക്കള്‍ അറിയിച്ചിട്ടുണ്ട്. കഴിഞ്ഞ വര്‍ഷം നടന്ന അസംബ്ലി തെരഞ്ഞടുപ്പില്‍ ബിജെപി 145 സീറ്റുകളിലും ശിവസേന 143 സീറ്റുകളിലും മത്സരിച്ചിരുന്നു.

മഹാരാഷ്ട്രയില്‍ ബിജെപിയുമായി സഖ്യത്തിലേര്‍പ്പെടണമെങ്കില്‍ 1995 ലെ ഫോര്‍മുലയിലായിരിക്കണമെന്നായിരുന്നു ശിവസേനയുടെ ഉപാധി. ആകെയുള്ള 288 സീറ്റുകളില്‍ ശിവസേന 171 സീറ്റുകളിലും ബിജെപി 117 സീറ്റുകളിലും മത്സരിച്ചതാണ് 1995ലെ ഫോര്‍മുല. അന്ന് ശിവസേന 73 സീറ്റുകളിലും ബിജെപി 65 സീറ്റുകളിലും ജയിക്കുകയും സേനയുടെ മനോഹര്‍ ജോഷിയുടെ നേതൃത്വത്തില്‍ സര്‍ക്കാര്‍ രൂപീകരിക്കുയും ചെയ്തിരുന്നു. അതേ സമയം 2014ല്‍ ഇരുപാര്‍ട്ടികളും ഒറ്റയ്‌ക്കൊറ്റക്ക് മത്സരിച്ചപ്പോള്‍ ബിജെപിക്ക് 122 സീറ്റുകള്‍ ലഭിച്ചു. ശിവസേനക്ക് 63 സീറ്റുകളില്‍ മാത്രമാണ് ജയിക്കാനായത്.