ജമ്മു: ഇന്ത്യക്കെതിരെ പോരാടുന്ന കശ്മീരികള്‍ക്കുള്ള പിന്തുണ തുടരുമെന്ന് വ്യക്തമാക്കി പാക് സൈനീക മേധാവി ഖമര്‍ ജാവേദ് ബജ്വ. നിയന്ത്രണ രേഖയ്ക്ക് സമീപം സന്ദര്‍ശനം നടത്തിയതിന് ശേഷമായിരുന്നു പാക് സൈനീക മേധാവിയുടെ പ്രകോപനപരമായ പരാമര്‍ശം. 

മനുഷ്യാവകാശത്തിനും, സ്വാതന്ത്ര്യത്തിനും വേണ്ടിയുള്ള കശ്മീരികളുടെ പോരാട്ടത്തില്‍ പാക്കിസ്ഥാന്‍ എന്നും അവരോടൊപ്പം നിന്നിട്ടുണ്ടെന്ന് ഖമര്‍ ജാവേദ് പറഞ്ഞു. 

സ്റ്റേറ്റ് സ്‌പോണ്‍സേര്‍ഡ് തീവ്രവാദമാണ് കശ്മീരില്‍ ഇന്ത്യ നടത്തുന്നതെന്നും പാക് സൈനീക മേധാവി ആരോപിച്ചു. കശ്മീരിലെ ജനങ്ങളോട് മാത്രമല്ല, നിയന്ത്രണ രേഖയില്‍ താമസിക്കുന്നവരോടും ഇന്ത്യ അതിക്രമം തുടരുകയാണ്. എന്നാല്‍ മൂല്യങ്ങള്‍ ഉയര്‍ത്തിപ്പിടിച്ച് സൈനീക തലത്തിലുള്ള മറുപടിയാണ് പാക്കിസ്ഥാന്‍ ഇന്ത്യയ്ക്ക് നല്‍കുന്നതെന്നും ജാവേദ് ഖമര്‍ അവകാശപ്പെടുന്നു.