ന്യൂഡെല്‍ഹി:  മുന്‍ രാഷ്ട്രപതി പ്രതിഭാ പാട്ടീലിനേക്കാള്‍ മോശം സ്ഥാനാര്‍ഥിയാണ് രാംനാഥ് കോവിന്ദ് എന്നര്‍ഥത്തില്‍ ട്വീറ്റ് ചെയ്ത പ്രമുഖ മാധ്യമപ്രവര്‍ത്തക റാണാ അയൂബിനെതിരേ ബിജെപി പോലീസില്‍ പരാതി നല്‍കി. ബിജെപി പാര്‍ട്ടി വക്താവ് നൂപുര്‍ ശര്‍മയാണ് റാണക്കെതിരെ പൊലീസില്‍ പരാതി നല്‍കിയത്. രാഷ്ട്രപതി സ്ഥാനാര്‍ത്ഥിയെ അപമാനിക്കുന്ന തരത്തിലുള്ള പോസ്റ്റാണ് റാണ ട്വിറ്ററില്‍ പോസ്റ്റ് ചെയ്തതെന്ന് ബിജെപി വ്യക്തമാക്കി.

എസ്‌സി/എസ്ടി നിയമപ്രകാരമാണ് പരാതി നല്‍കിയിട്ടുള്ളത്. ജാതീയവും ബഹുമാനമില്ലാത്തതുമായ പരാമര്‍ശമാണ് റാണയുടേതെന്നും ബിജെപി. പരാതിയുടെ പൂര്‍ണരൂപം ട്വിറ്ററില്‍ പോസ്റ്റ് ചെയ്തിട്ടുണ്ട്. കേസ് ദളിതര്‍ക്കെതിരായ പീഡനം തടയല്‍ നിയമത്തിന്റെ വകുപ്പില്‍ ഉള്‍പ്പെടുത്തണമെന്നാണ് ബി.ജെ.പിയുടെ ആവശ്യം.