വിശാഖപട്ടണം:  മധ്യപ്രദേശില്‍ തെരുവില്‍ വിസര്‍ജനം നടത്തിയതിന് രണ്ട് ദളിത് കുട്ടികളെ അടിച്ചു കൊന്ന സംഭവത്തിന്റെ ഞെട്ടല്‍ മാറും മുന്‍പ് മറ്റൊന്ന്. ആന്ധ്രാപ്രദേശിലെ വിശാഖപട്ടണത്ത് മന്ത്രവാദം നടത്തിയെന്ന് ആരോപിച്ച് ദലിത് വിഭാഗത്തില്‍പ്പെട്ട 55 വയസ്സുകാരനെ ഒരു സംഘം ആളുകള്‍ മര്‍ദിക്കുകയും ജീവനോടെ തീകൊളുത്തുകയും ചെയ്തു. പുട്ടബന്ധ ഗ്രാമത്തിലെ കിലോ ജയറാമാണ് ക്രൂരമായ ആക്രമണത്തിന് വിധേയനായത്.

ജയറാം മന്ത്രവാദം ചെയ്തതുകൊണ്ട് ഒരു പെണ്‍കുട്ടി മരിക്കാനും പത്ത് വയസ്സുകാരി അസുഖബാധിതയാകാനും കാരണമായെന്ന് നാട്ടുകാരുടെ ഇടയില്‍ ആക്ഷേപം ഉയര്‍ന്നിരുന്നു. ഇതിന് പിന്നാലെ അസുഖബാധിതയായ പെണ്‍കുട്ടിയുടെ ബന്ധുക്കള്‍ ജയറാമിനെ കൂര്രമായി മര്‍ദിക്കുകയായിരുന്നു. തുടര്‍ന്ന് പെട്രോള്‍ ഒഴിച്ച് ജീവനോടെ ജയറാമിനെ തീകൊളുത്തുകയായിരുന്നുവെന്ന് പൊലീസ് പറയുന്നു.

ജയറാമിന്റെ ബന്ധുക്കള്‍ പൊലീസ് സ്റ്റേഷനില്‍ പരാതിപ്പെട്ടതോടെയാണ് സംഭവം പുറംലോകം അറിഞ്ഞത്. പകര്‍ച്ചവ്യാധി പിടിപ്പെട്ടാണ് കുട്ടി അസുഖബാധിതയായതെന്ന് പൊലീസ് പറയുന്നു.ദിവസങ്ങള്‍ക്ക് മുന്‍പ് കുട്ടി അസുഖബാധിതയായ വിഷയം നാട്ടുകൂട്ടം ചര്‍ച്ച ചെയ്തിരുന്നു. അവിടെവച്ച് കുട്ടിയുടെ ബന്ധുക്കള്‍ ജയറാമിനെ മന്ത്രവാദിയായി ചിത്രീകരിച്ചിരുന്നതായും പൊലീസ് പറയുന്നു.