ന്യൂഡല്‍ഹി: ഓടിക്കൊണ്ടിരുന്ന ട്രക്കില്‍ കയറ്റിയിരുന്ന കണ്ടെയ്‌നര്‍ കാറിന് മുകളിലേക്ക് മറിഞ്ഞുവീണ് രണ്ടുപേര്‍ക്ക് ദാരുണാന്ത്യം. അപകടത്തില്‍ കാര്‍ പൂര്‍ണമായി തകര്‍ന്നു. സംഭവസ്ഥലത്ത് വച്ച് തന്നെ ഇരുവരും മരിച്ചതായി പൊലീസ് പറയുന്നു. ട്രക്കിന്റെ ഡ്രൈവര്‍ ഒളിവിലാണ്. 

കിഴക്കന്‍ ഡല്‍ഹിയിലെ ലജ്പത് നഗറില്‍ ബുധനാഴ്ച റോഡില്‍ തിരക്കുളള സമയത്താണ് അപകടം. ഈവന്റ് മാനേജ്‌മെന്റ് കമ്പനിയിലെ ജീവനക്കാരായ 35 വയസ്സുളള അങ്കിത് മല്‍ഹോത്രയും രജ്ഞന്‍ കല്‍റയുമാണ് മരിച്ചത്. ഇരുവരും കാറില്‍ വീട്ടിലേക്ക് പോകുന്ന വഴിയാണ് സംഭവം ഉണ്ടായത്. നിയന്ത്രണം വിട്ട് ട്രക്കും ഒരു വശത്തേയ്ക്ക് മറിഞ്ഞു.

കണ്ടെയ്‌നര്‍ വീഴുന്ന സമയത്ത് ട്രക്കിന് സമീപമായിരുന്നു കാര്‍. സെഡന്റെ മുകള്‍വശം പൂര്‍ണമായി തകര്‍ന്നു.അതിനടിയില്‍പ്പെട്ടാണ് ഇരുവരും മരിച്ചത്. അരിച്ചാക്കുകള്‍ നിറച്ച കണ്ടെയ്‌നറാണ് മറിഞ്ഞത്. ജെസിബി ഉപേയോഗിച്ച് കണ്ടെയ്‌നര്‍ റോഡില്‍ നിന്ന് നീക്കം ചെയ്തു. ഇരുവരും കൊല്‍ക്കത്തയിലേക്കുളള വിമാനത്തില്‍ വീട്ടിലേക്ക് മടങ്ങുന്നതിന് വിമാനത്താവളത്തിലേക്ക് പോകുന്നതിനിടെയാണ് അപകടം ഉണ്ടായത്.