ശ്രീനഗര്‍: ജമ്മു കശ്മീരില്‍ ഇന്നലെ രാത്രി പെയ്ത കനത്ത മഴയില്‍ റോഡിന്റെ ഒരു ഭാഗം ഒലിച്ചുപോയി. റോഡില്‍ പാര്‍ക്ക് ചെയ്തിരുന്ന വാഹനങ്ങള്‍ കുന്നിന്റെ താഴ്‌വരയിലേക്ക് പതിച്ചു. 3 വാഹനങ്ങള്‍ക്കാണ് കാര്യമായ കേടുപാടുകള്‍ സംഭവിച്ചത്. ഇതിന്റെ വീഡിയോ പുറത്തുവന്നു.

പഞ്ചതീര്‍ത്ഥിയുമായി ബന്ധിപ്പിക്കുന്ന സര്‍ക്യൂലര്‍ റോഡിന്റെ ഒരു ഭാഗമാണ് കനത്തമഴയില്‍ ഒലിച്ചുപോയത്. റോഡിന്റെ ഭാഗം താഴ്‌വരയിലേക്കാണ് ഒലിച്ചിറങ്ങിയത്. ഇവിടെ പാര്‍ക്ക് ചെയ്തിരുന്ന വാഹനങ്ങള്‍ക്കാണ് കേടുപാടുകള്‍ സംഭവിച്ചത്. ഇതിന് പുറമേ കനത്തമഴയില്‍ സര്‍ക്കാര്‍ മെഡിക്കല്‍ കോളജിലെ ടോയ്‌ലെറ്റിന്റെ സംരക്ഷണഭിത്തിയും ഇടിഞ്ഞുവീണിട്ടുണ്ട്.

കഴിഞ്ഞ ഏതാനും ദിവസമായി ജമ്മു കശ്മീരില്‍ കനത്തമഴയാണ് ലഭിക്കുന്നത്. താഴ്ന്നപ്രദേശങ്ങളില്‍ വെളളം നിറഞ്ഞു. അംബേദ്ക്കര്‍ നഗര്‍ ഉള്‍പ്പെടെയുളള പ്രദേശങ്ങളില്‍ 3 അടിയിലേറെ വെള്ളം പൊങ്ങി.