ബംഗലൂരു: മുന്‍നിശ്ചയിച്ചതില്‍ നിന്നും വ്യത്യസ്തമായി കര്‍ണാടകയില്‍ ബുധനാഴ്ച മുഖ്യമന്ത്രിക്കൊപ്പം ഉപമുഖ്യമന്ത്രിയും സത്യപ്രതിജ്ഞ ചെയ്യും. ജെഡിഎസ് സംസ്ഥാന പ്രസിഡന്റ് എച്ച് ഡി കുമാരസ്വാമി മുഖ്യമന്ത്രിയായും, കോണ്‍ഗ്രസ് സംസ്ഥാന അധ്യക്ഷന്‍ ജി പരമേശ്വര ഉപമുഖ്യമന്ത്രിയുമായാണ് സത്യപ്രതിജ്ഞ ചെയ്യുക. സത്യപ്രതിജ്ഞയ്ക്ക് ശേഷം മന്ത്രിമാരുടെ കാര്യത്തില്‍ തീരുമാനമെടുക്കുമെന്ന് കുമാരസ്വാമി പറഞ്ഞു. 29 ന് ശേഷം ഇവരുടെ സത്യപ്രതിജ്ഞ നടത്താനാണ് ജെഡിഎസും കോണ്‍ഗ്രസും തമ്മിലുളള ചര്‍ച്ചയില്‍ ധാരണയായിരിക്കുന്നത്.

34 അംഗ മന്ത്രിസഭ രൂപീകരിക്കാനാണ് കോണ്‍ഗ്രസും ജെഡിഎസും തമ്മില്‍ ധാരണയായിരിക്കുന്നത്. 22 മന്ത്രിസ്ഥാനങ്ങള്‍ കോണ്‍ഗ്രസിന് നല്‍കാനാണ് ഇപ്പോള്‍ ഇരുവരും യോജിപ്പിലെത്തിയിരിക്കുന്നത്.കോണ്‍ഗ്രസിന്റെ കെ ആര്‍ രമേഷ്‌കുമാറിനെ സ്പീക്കറായി തെരഞ്ഞെടുത്തു.ഡെപ്യൂട്ടീ സ്പീക്കര്‍ സ്ഥാനം ജെഡിഎസിന് നല്‍കാനും ചര്‍ച്ചയില്‍ ധാരണയായി.