ന്യൂഡല്‍ഹി: ഉത്തര്‍പ്രദേശിലെ ക്രമസമാധാന നിലയുമായി ബന്ധപ്പെട്ട് വിമര്‍ശനം ഉന്നയിച്ച എഐസിസി ജനറല്‍ സെക്രട്ടറി പ്രിയങ്കഗാന്ധിക്ക് മറുപടിയുമായി മുഖ്യമന്ത്രി യോഗി ആദിത്യനാഥ്. കിട്ടാത്ത മുന്തിരി പുളിക്കും എന്ന് പറഞ്ഞ് തെരഞ്ഞെടുപ്പ് തോല്‍വിയെ ഓര്‍മ്മിപ്പിച്ചു കൊണ്ടായിരുന്നു യോഗിയുടെ വിമര്‍ശനം. 

ഉത്തര്‍പ്രദേശില്‍ ക്രിമിനലുകള്‍ സ്വതന്ത്രമായി ചുറ്റിനടന്ന് അഴിഞ്ഞാട്ടം നടത്തുകയാണെന്നാണ് പ്രിയങ്കയുടെ വിമര്‍ശനം. ഇതിന് മറുപടിയുമായാണ് യോഗി രംഗത്തുവന്നത്.'അവരുടെ പാര്‍ട്ടി പ്രസിഡന്റ് യുപിയില്‍ മത്സരിച്ച് തോറ്റു.ഇപ്പോള്‍ ഡല്‍ഹിയിലോ ഇറ്റലിയിലോ ഇംഗ്ലണ്ടിലോ ഇരുന്ന് വാര്‍ത്തകളില്‍ ഇടം പിടിക്കാനായി ഓരോ പ്രസ്താവനകള്‍ നടത്തുകയാണ്.' അദ്ദേഹം കുറ്റപ്പെടുത്തി.

'യു.പി.യില്‍ കുറ്റവാളികള്‍ യഥേഷ്ടം വിളയാടുന്നു. കുറ്റകൃത്യങ്ങള്‍ വര്‍ധിച്ചുവരുന്നു. ഇതെല്ലാം ബിജെപി സര്‍ക്കാരിന്റെ ബധിരകര്‍ണങ്ങളിലാണു പതിക്കുന്നത്. യുപി സര്‍ക്കാര്‍ ക്രിമിനലുകള്‍ക്ക് കീഴടങ്ങിയോ?' എന്നായിരുന്നു പ്രിയങ്ക ട്വിറ്ററില്‍ കുറിച്ചത്. സംസ്ഥാനത്ത് നടന്ന വിവിധ കുറ്റകൃത്യങ്ങളുടെ വാര്‍ത്തകള്‍ ടാഗ് ചെയ്തുകൊണ്ടായിരുന്നു പ്രിയങ്കയുടെ ട്വീറ്റ്.