ഹൈദരാബാദ്: കൈക്കൂലി കേസില്‍ അറസ്റ്റിലായ റവന്യു ഉദ്യോഗസ്ഥന്റെ വീട്ടില്‍ നിന്ന് പിടിച്ചെടുത്തത് 1.1 കോടി രൂപ. തെലങ്കാനയിലെ മെഡ്ചാല്‍ ജില്ലയിലാണ് സംഭവം. കൈക്കൂലി വാങ്ങുന്നതിനിടെ പിടിയിലായ എര്‍വ ബാലരാജുവിന്റെ വീട്ടില്‍ നിന്നാണ് ഞെട്ടിക്കുന്ന തുക പിടിച്ചെടുത്തത്.

തെലങ്കാന അഴിമതി വിരുദ്ധ ബ്യൂറോയാണ് ഇയാളെ അറസ്റ്റ് ചെയ്തത്. എ എസ് റാവു നഗറിലെ വാടക വീട്ടില്‍വെച്ച് കൈക്കൂലി വാങ്ങുന്നതിനിടെയാണ് ഇയാള്‍ പിടിയിലായത്.

സംഭവവുമായി ബന്ധപ്പെട്ട് ഒരു വില്ലേജ് ഓഫിസറേയും രണ്ട് റിയല്‍ എസ്റ്റേറ്റ് ഏജന്റുമാരേയും അറസ്റ്റ് ചെയ്തിട്ടുണ്ട്. തന്റെ അധികാര പരിധിയിലെ 28 ഏക്കര്‍ സ്ഥലത്തെ തര്‍ക്കം പരിഹരിക്കുവാനാണ് ബാലരാജു രണ്ടുകോടി രൂപ ആവശ്യപ്പെട്ടതെന്ന് ഉദ്യോഗസ്ഥര്‍ വ്യക്തമാക്കി.