ജനീവ: ഏഷ്യയിലെ ഏറ്റവും വലിയ ചേരിപ്രദേശമായ മുംബൈ ധാരാവിയിലെ കോവിഡ് നിയന്ത്രണ നടപടികളെ പ്രശംസിച്ച് ലോകാരോഗ്യ സംഘടന. എല്ലാവരെയും ഒരുമിപ്പിച്ചുകൊണ്ടുള്ള ത്വരിത ഗതിയിലുള്ള പ്രവര്‍ത്തനങ്ങള്‍ കൊണ്ടേ കോവിഡിനെ നേരിടാനാവൂ എന്ന് ഡബ്ല്യൂഎച്ച്ഒ ചൂണ്ടിക്കാട്ടി.

''തീവ്രമായ വ്യാപനം ഉണ്ടായിട്ടുപോലും വൈറസ് ബാധയെ നിയന്ത്രണത്തില്‍ കൊണ്ടുവന്നതിന് ലോകത്ത് പലയിടത്തും ഉദാഹരണങ്ങളുണ്ട്'' -ഡബ്ല്യൂഎച്ച്ഒ ഡയറക്ടര്‍ ജനറല്‍ ടെഡ്രസ് അദ്‌നോം ഗെബ്രിസിയൂസ് പറഞ്ഞു. ഇറ്റലി, സ്‌പെയിന്‍, സൗത്ത് കൊറിയ എന്നിവിടങ്ങളിലെല്ലാം ഇങ്ങനെ വൈറസ് വ്യാപനം തടഞ്ഞുനിര്‍ത്തിയിട്ടുണ്ട്. ജനങ്ങള്‍ അത്രയധികം തിങ്ങിപ്പാര്‍ക്കുന്ന മുംബൈയിലെ ധാരാവിയില്‍ പോലും അതിനു കഴിഞ്ഞു. ജനങ്ങളെ വന്‍തോതില്‍ പങ്കെടുപ്പിച്ചുകൊണ്ടാണ് അതു സാധ്യമാക്കിയത്- ഡബ്ല്യൂഎച്ച്ഒ മേധാവി പറഞ്ഞു.

നിയന്ത്രണങ്ങളില്‍ ഇളവു വരുന്ന രാജ്യങ്ങളില്‍ വൈറസ് വ്യാപനം രൂക്ഷമാവുന്നുണ്ടെന്നാണ് ലോകാരോഗ്യ സംഘടനയുടെ വിലയിരുത്തല്‍. മികച്ച നേതൃത്വം ജനങ്ങളുടെ പങ്കാളിത്തവും കൂട്ടായ ശ്രമവും ഉള്ള ഇടങ്ങളില്‍ വൈറസിനെ നിയന്ത്രിക്കാനാവും.

ധാരാവിയില്‍ ഇതുവരെ 2347 കോവിഡ് കേസുകളാണ് റിപ്പോര്‍ട്ട് ചെയ്യപ്പെട്ടത്. നേരത്തെ അതിവേഗം രോഗവ്യാപനം റിപ്പോര്‍ട്ട് ചെയ്യപ്പെട്ട ഇവിടെ പിന്നീട് സ്ഥിതിഗതികള്‍ നിയന്ത്രണത്തിലാക്കിയിരുന്നു. വ്യാഴാഴ്ച ഒന്‍പതു പുതിയ കേസുകള്‍ മാത്രമാണ് ധാരാവിയില്‍ റിപ്പോര്‍ട്ട് ചെയ്തത്.