അഗര്‍ത്തല : നാട്ടിലെത്തിയ കോവിഡ് ബാധിതനായ സൈനികന്‍ വീട്ടില്‍ അച്ഛന്റെ 'ശ്രാദ്ധ ചടങ്ങ്' നടത്തി. അടുത്ത ബന്ധുക്കളടക്കം 40 പേര്‍ ചടങ്ങില്‍ പങ്കെടുത്തു. കഴിഞ്ഞയാഴ്ച നാട്ടിലെത്തിയ അസം റൈഫിള്‍സ് ജവാനാണ് രോഗവിവരം മറച്ചുവെച്ച് ചടങ്ങു നടത്തിയത്. 

ത്രിപുരയിലെ അഗര്‍ത്തലയിലാണ് സംഭവം. കോവിഡ് സ്ഥിരീകരിച്ചതിനെ തുടര്‍ന്ന് ഇയാളോട് ഹോം ക്വാറന്റീനില്‍ പോകാന്‍ നിര്‍ദേശിച്ചതായിരുന്നു. എന്നാല്‍ വീട്ടിലെത്തിയ ഇയാള്‍ രോഗവിവരം മറച്ചുവെച്ച് ചടങ്ങ് ഗംഭീരമായി നടത്തുകയായിരുന്നു. 

കോവിഡ് പ്രോട്ടോക്കോള്‍ ഒന്നും പാലിക്കാതെയായിരുന്നു ചടങ്ങ് നടത്തിയത്. വീട്ടുകാരില്‍ നിന്നും, ശ്രദ്ധ ചടങ്ങിന് എത്തിയ ബന്ധുക്കളില്‍ നിന്നും വരെ ഇയാള്‍ രോഗവിവരം മറച്ചുവെച്ചു. 

പിറ്റേന്ന് വിവരം അറിഞ്ഞെത്തിയ പൊലീസ് വീട് റെയ്ഡ് ചെയ്യുകയും, സൈനികനെ കോവിഡ് കെയര്‍ സെന്ററിലേക്ക് മാറ്റുകയുമായിരുന്നു. ശ്രാദ്ധ ചടങ്ങില്‍ പങ്കെടുക്കുകയും, ജവാനുമായി സമ്പര്‍ക്കം പുലര്‍ത്തുകയും ചെയ്ത എല്ലാവരോടും നിരീക്ഷണത്തില്‍ പോകാനും അധികൃതര്‍ നിര്‍ദേശിച്ചു.