ഷില്ലോങ്: പല്ലുതേക്കുന്നതിനിടെ വിഴുങ്ങിപ്പോയ ബ്രഷ് ശസ്ത്രക്രിയ കൂടാതെ ഡോക്ടര്‍മാര്‍ പുറത്തെടുത്തു. മേഘാലയയിലെ ഷില്ലോങിലാണ് സംഭവം.

കഴിഞ്ഞമാസമാണ് പല്ല് തേക്കുന്നതിനിടെ അബദ്ധത്തില്‍ 50 കാരി ബ്രഷ് വിഴുങ്ങിയത്. ബ്രഷ് വിഴുങ്ങിയെങ്കിലും യാതൊരു പ്രശ്‌നങ്ങളും ഇവര്‍ക്കുണ്ടായതുമില്ല. മകളുടെ നിര്‍ബന്ധത്തിന് വഴങ്ങി കഴിഞ്ഞ ദിവസം ഇവര്‍ ആശുപത്രിയില്‍ എത്തിയതോടെയാണ് ബ്രഷ് വയറ്റില്‍ തന്നെയുണ്ടെന്ന് സ്ഥിരീകരിച്ചത്.

എന്‍ഡോസ്‌കോപ്പ് ഉപയോഗിച്ച് വായ വഴി ബ്രഷ് പുറത്തെടുക്കുകയായിരുന്നുവെന്ന് ഡോക്ടര്‍മാര്‍ വെളിപ്പെടുത്തി. ഇവര്‍ പൂര്‍ണ ആരോഗ്യവതിയായിരിക്കുന്നുവെന്നും സര്‍ജറിയുടെ ആവശ്യം ഉണ്ടായില്ലെന്നും ഡോക്ടര്‍മാര്‍ വ്യക്തമാക്കി. അര മണിക്കൂറിനുള്ളില്‍ വിജയകരമായി ബ്രഷ് പുറത്തെടുക്കുകയായിരുന്നു.