ചണ്ഡീഗഡ്: പ്രതീക്ഷിച്ച സമ്മാനം ലഭിച്ചില്ലെങ്കില്‍ നിരാശ തോന്നുന്നത് സ്വാഭാവികം മാത്രമാണ്. പക്ഷേ പ്രതീക്ഷിച്ച സമ്മാനത്തിന് പകരം വെറൊന്ന് ലഭിച്ചാല്‍ തൃപ്തിപ്പെടുന്നവരാണ് ഭൂരിഭാഗംപേരും.പകരം കിട്ടുന്നത് വിലപിടിപ്പുളളതാണെങ്കില്‍ പിന്നെ പറയുകയും വേണ്ട. കിട്ടിയതുകൊണ്ട് സന്തോഷിക്കും. എന്നാല്‍ വിലപിടിപ്പുളള സമ്മാനം ലഭിച്ചിട്ടും അതിലും തൃപ്തിയാകാതെ ദേഷ്യത്തോടെ ഒരു യുവാവ് ചെയ്ത വ്യത്യസ്ത പ്രവൃത്തിയാണ് ഇപ്പോള്‍ സോഷ്യല്‍മീഡിയയില്‍ പ്രചരിക്കുന്നത്.

വിചിത്രമായ സംഭവം ഹരിയാനയിലാണ് റിപ്പോര്‍ട്ട് ചെയ്തത്. തന്റെ പിറന്നാളിന് സമ്മാനമായി ആഢംബര കാര്‍ ആയ ജാഗ്വാര്‍ വേണമെന്ന് യുവാവ് മാതാപിതാക്കളോട് ആവശ്യപ്പെട്ടു. എന്നാല്‍ ജാഗ്വാറിന് പകരം ബിഎംഡബ്ല്യു വാങ്ങി നല്‍കി. 

എന്നാല്‍ ആഗ്രഹിച്ച സമ്മാനം ലഭിക്കാത്തതിനാല്‍ യുവാവ് പ്രകോപിതനായി. പെട്ടെന്നുണ്ടായ ദേഷ്യത്തില്‍ യുവാവ് വാഹനം പുഴയില്‍ തള്ളി. വാഹനം പുഴയില്‍ മുങ്ങുന്നതിന്റെ ദൃശ്യങ്ങള്‍ ഷൂട്ട് ചെയ്ത് സോഷ്യല്‍ മീഡിയയില്‍ പ്രചരിപ്പിക്കുകയും ചെയ്തു. 

എന്നാല്‍ അല്‍പ്പസമയത്തിനുള്ളില്‍ യുവാവിന്റെ ദേഷ്യമടങ്ങി. നാട്ടുകാരെ കൂട്ടിയെത്തി വാഹനം കരയിലെത്തിക്കാന്‍ ശ്രമിക്കുന്നതിന്റെ ദൃശ്യങ്ങള്‍ ഇപ്പോള്‍ വൈറലായിരിക്കുകയാണ്. യുവാവിനെതിരെ വിമര്‍ശനങ്ങളും പരിഹാസങ്ങളും നിറയുകയാണ്. സംഭവത്തില്‍ യുവാവിനെതിരെ കേസെടുത്തിട്ടുണ്ടെന്ന് പൊലീസ് പറഞ്ഞു.