പറ്റ്‌ന: ബിഹാര്‍ നിയമസഭാ തെരഞ്ഞെടുപ്പിന്റെ ആദ്യഘട്ട വോട്ടെടുപ്പിന് പത്ത് ദിവസങ്ങള്‍ മാത്രം ബാക്കിനില്‍ക്കെ ബിജെപിയുടെ പ്രചാരണത്തിനായി പ്രധാനമന്ത്രി നരേന്ദ്രമോദി എത്തുന്നു.  12 റാലികളിലാണ് മോദി പങ്കെടുക്കുന്നത്. ഓക്ടോബര്‍ 23ന് ദെഹ്രിയിലെ സംസരമിലാണ് പ്രധാനമന്ത്രിയുടെ ആദ്യറാലി. പരിപാടിയില്‍ മുഖ്യമന്ത്രി നിതീഷ് കുമാറും സംബന്ധിക്കും.

ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് 18 പരിപാടികളിലാണ് പങ്കെടുക്കുക. താരപ്രചാരകന്‍ എന്ന നിലയില്‍ യോഗി ആദിത്യനാഥാണ് സംസ്ഥാനത്തെ പ്രചാരണരംഗത്തെ മുഖ്യആകര്‍ഷണം. ഒരു ദിവസം മൂന്ന് പരിപാടി എന്ന നിലയിലാണ് യോഗിയുടെ പരിപാടി തയ്യാറാക്കിയിട്ടുള്ളത്. ചൊവ്വാഴ്ച മുതലാണ് യോഗിയുടെ പ്രചാരണം ആരംഭിക്കുക

യുപിയുമായി അതിര്‍ത്തി പങ്കിടുന്ന മണ്ഡലങ്ങളില്‍ യോഗി ആദിത്യനാഥ് പ്രചാരണത്തിനെത്തുന്നത് ഏറെ ഗുണകരമാകുമെന്നാണ് ബിജെപിയുടെ വിലയിരുത്തല്‍. 243 മണ്ഡലങ്ങളിലേക്കുള്ള ആദ്യഘട്ട തെരഞ്ഞെടുപ്പ് ഒക്ടോബര്‍28നും രണ്ടാംഘട്ടം നവംബര്‍ മൂന്നിനും മൂന്നാം ഘട്ടം നവംബര്‍ ഏഴിനുമാണ്. പത്താം തിയ്യതിയാണ് ഫലപ്രഖ്യാപനം.