ഭോപ്പാല്‍: ഭാര്യയ്ക്ക് സെല്‍ഫി ഭ്രാന്തെന്ന് പറഞ്ഞ് ഭര്‍ത്താവ് കോടതിയില്‍. ഭാര്യയ്ക്ക് തനിക്കൊപ്പം ചെലവാക്കാന്‍ സമയമില്ലെന്നും എല്ലാ സമയത്തും സ്മാര്‍ട്ട് ഫോണില്‍ സെല്‍ഫിയെടുക്കലാണെന്നാണ് പരാതി. മധ്യപ്രദേശ് സ്വദേശിയായ യുവാവാണ് ഭാര്യയുടെ അമിതമായ ഫോണ്‍ ഉപയോഗത്തെ തുടര്‍ന്ന് ബന്ധം വേര്‍പ്പെടുത്തണമെന്നാവശ്യപ്പെട്ട് കോടതിയെ സമര്‍പ്പിച്ചിരിക്കുന്നത്. 

അതേസമയം തനിക്ക് സ്മാര്‍ട്ട് ഫോണ്‍ ഇല്ലെന്നും തന്റെ കയ്യിലുള്ളത് സാധാരണ ഫോണാണെന്നുമാണ് ഭാര്യ കോടതിയില്‍ പറഞ്ഞത്. വീട്ടുകാരുമായി പോലും സംസാരിക്കാന്‍ ഭര്‍ത്താവ് അനുവദിക്കാറില്ലെന്നും ഭാര്യ കോടതിയില്‍ ആരോപിച്ചു. എന്നാല്‍ വിവാഹം കഴിഞ്ഞതു മുതല്‍ ഇരുപത്തിനാല് മണിക്കൂറും ഫോണില്‍ തന്നെയാണ് ഭാര്യ സമയം ചിലവഴിക്കുന്നതെന്നാണ് യുവാവ് ആരോപിക്കുന്നത്. 

ഭാര്യയ്ക്ക് സെല്‍ഫി എടുക്കുന്നതിനോട് അമിത ആസക്തിയാണെന്നും യുവാവ് കോടതിയില്‍ ആരോപിച്ചു. ഫോണില്‍ സമയം ചിലവിടുമ്പോള്‍ തനിക്ക് ഭക്ഷണം നല്‍കുന്നില്ലെ എന്ന് തുടങ്ങിയ പരാതികളും ഭര്‍ത്താവ് കോടതിയില്‍ ഉന്നയിച്ചു. 

വാദം കേട്ടതിന് ശേഷം ഇരുവരെയും തിരികെ നല്ലൊരു ദാമ്പത്യത്തിനായി പ്രാപ്തരാക്കുന്നതിനു വേണ്ടി കൗണ്‍സിലിങ് നല്‍കാന്‍ കോടതി ഉത്തരവിട്ടിരിക്കുകയാണ്. കഴിഞ്ഞ വര്‍ഷം ഏപ്രിലില്‍ ഫോണ്‍ ഉപയോഗത്തിന്റെ പേരില്‍ ഗുരുഗ്രാം സ്വദേശി ഭാര്യയെ കൊലപ്പെടുത്തിയിരുന്നുന്നു.