ഭോപ്പാല്: മധ്യപ്രദേശില് അമ്പലത്തില് പൂജാരിയാകാന് വേറിട്ട മാര്ഗനിര്ദേശവുമായി കമല്നാഥ് സര്ക്കാര്. സര്ക്കാര് നിയന്ത്രണത്തിലുളള അമ്പലങ്ങളില് പൂജാരിമാരാകണമെങ്കില് നോണ് വെജിറ്റേറിയന് ഭക്ഷണവും മദ്യവും കഴിക്കുന്നവരാകാന് പാടില്ല എന്ന കര്ശന നിര്ദേശമാണ് സര്ക്കാര് പുറപ്പെടുവിച്ചിരിക്കുന്നത്. പൂജാരിമാരുടെ നിയമനവുമായി ബന്ധപ്പെട്ടാണ് സര്ക്കാര് പുതിയ മാര്ഗനിര്ദേശം കൊണ്ടുവന്നിരിക്കുന്നത്.
ദിവസങ്ങള്ക്ക് മുന്പ് പൂജാരിമാരുടെ ഹോണറേറിയം കമല്നാഥ് സര്ക്കാര് വര്ധിപ്പിച്ചിരുന്നു. ശമ്പളത്തിന് പകരം ചെയ്യുന്ന ജോലിക്കുളള പ്രതിഫലമായ ഓണറേറിയം ആയിരം രൂപയില് നിന്ന് 3000 രൂപയായാണ് ഉയര്ത്തിയത്. ഇതിന് പിന്നാലെയാണ് പൂജാരിമാരുടെ നിയമനവുമായി ബന്ധപ്പെട്ട് കടുത്ത നിയന്ത്രണങ്ങളുമായി സര്ക്കാര് മുന്നോട്ടുവന്നിരിക്കുന്നത്.
പൂജാരിമാര് നോണ്വെജിറ്റേറിയന് ഭക്ഷണം, മദ്യം എന്നിവ ഉപയോഗിക്കുന്നവരാകാന് പാടില്ല എന്നതിന് പുറമേ ഇവര്ക്ക് ക്രിമിനല് പശ്ചാത്തലമുണ്ടാവരുതെന്നും സര്ക്കാര് നിഷ്കര്ഷിക്കുന്നു. 18 വയസിന് മുകളിലുളളവരും പൂജാകാര്യങ്ങളെ കുറിച്ച് അറിവുണ്ടെന്ന് സ്ഥാപിക്കുന്ന സര്ട്ടിഫിക്കറ്റുകള് കൈവശമുളളവരും മാത്രം പൂജാരി തസ്തികയിലേക്ക് അപേക്ഷിച്ചാല് മതിയെന്നും സര്ക്കാരിന്റെ മാര്ഗനിര്ദേശത്തില് പറയുന്നു. എട്ടാംക്ലാസ് വരെയുളള അടിസ്ഥാന വിദ്യാഭ്യാസം,ശാരിരീകക്ഷമത അടക്കമുളള വ്യവസ്ഥകളും മാര്ഗനിര്ദേശത്തില് ഉള്പ്പെടുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates