ദേവന്‍ഗരെ: മദ്യപിച്ച് ലക്കുകെട്ടയാള്‍ നടുറോഡില്‍ ട്രാഫിക് പൊലീസുകാരെ കയ്യേറ്റം ചെയ്യുന്ന വീഡിയോ സമൂഹമാധ്യമങ്ങളില്‍ വൈറലായിരുന്നു. സംഭവത്തിലെ പ്രതി ഒരു അഭിഭാഷകനാണെന്ന് പൊലീസ് വ്യക്തമാക്കി. മദ്യപിച്ച് ഇരുചക്ര വാഹനമോടിച്ചതിന് ശ്വാസ പരിശോധനക്ക് വിധേയനാക്കാന്‍ ശ്രമിക്കുന്നതിനിടെയാണ് സംഭവം. കര്‍ണാടകയിലെ ദേവന്‍ഗരെയിലാണ് സംഭവം. 

റോഡരികിലെ വില്‍പ്പനക്കാരന്റെ പക്കല്‍നിന്ന് മണ്‍പാത്രമെടുത്ത അഭിഭാഷകന്‍ രുദ്രപ്പ ട്രാഫിക് പോലീസുദ്യോഗസ്ഥന്റെ തലയ്ക്ക് അടിക്കുകയായിരുന്നു. പിന്നീട് രണ്ടാമത്തെ ഉദ്യോഗസ്ഥനെ റോഡിലേക്ക് തള്ളിയിടുന്നതും വീഡിയോയില്‍ കാണാം. 

സംഭവത്തെ തുടര്‍ന്ന് രുദ്രപ്പയെ അറസ്റ്റ് ചെയ്ത് ഡ്യൂട്ടിയിലുണ്ടായിരുന്ന ഉദ്യോഗസ്ഥരെ മര്‍ദിച്ചതിന് കേസെടുത്തതായി ദേവന്‍ഗരെ എസ്പി ചേതന്‍ സിങ് റാത്തോഡ് അറിയിച്ചു. മെഡിക്കല്‍ റിപ്പോര്‍ട്ട് വന്നതിന് ശേഷം ഇയാള്‍ക്കെതിരെ മദ്യപിച്ച് വാഹനമോടിച്ചതിനും കേസെടുക്കും.