ബെംഗളൂരു: കര്‍ണാടകയിലെ എന്‍ഡിഎ മുഖ്യമന്ത്രി സ്ഥാനാര്‍ത്ഥി യദ്യൂരപ്പ നമ്പര്‍ വണ്‍ അഴിമതിക്കാരനാണെന്ന് പറഞ്ഞതിന് പിന്നാലെ വീണ്ടും അബദ്ധം പിണഞ്ഞ് ബിജെപി അധ്യക്ഷന്‍ അമിത് ഷാ. ഇത്തവണ പക്ഷേ അമിത് ഷായ്ക്ക് പണി കൊടുത്തത് പരിഭാഷകന്‍ പ്രഹ്ലാദ് ജോഷിയാണ്.
പാവങ്ങള്‍ക്കും ദളിതര്‍ക്കും വേണ്ടി ഒന്നും ചെയ്യാത്ത മുഖ്യമന്ത്രിയാണ് സിദ്ധരാമയ്യ എന്ന കുറ്റപ്പെടുത്തല്‍ തര്‍ജിമ ചെയ്ത് പറഞ്ഞപ്പോഴാണ് അബദ്ധം പിണഞ്ഞത്. മോദി പാവപ്പെട്ടവര്‍ക്കും ദലിതര്‍ക്കും വേണ്ടി ഒന്നും ചെയ്യുന്നില്ല എന്നാണ് അമിത് ഷായുടെ ഹിന്ദി പ്രസംഗം  പ്രഹ്ലാദ് ജോഷി എംപി കന്നടയിലാക്കി പറഞ്ഞത്. 

ടൈംസ് നൗവാണ് പ്രഹ്ലാദ് ജോഷിയുടെ നാക്ക് പിഴ വീഡിയോ പുറത്തുവിട്ടത്. എന്നാല്‍ നിമിഷങ്ങള്‍ക്കുള്ളില്‍ വീഡിയോ പിന്‍വലിക്കപ്പെട്ടു. 
എന്നാല്‍ ഉടനെതന്നെ പ്രഹ്ലാദ് ജോഷിയുടെ പരിഭാഷ സമൂഹമാധ്യമങ്ങളില്‍ എത്തിച്ച് കോണ്‍ഗ്രസ് അമിത് ഷായ്ക്കും മോദിക്കും വീണ്ടും പണികൊടുത്തു. 

കഴിഞ്ഞ ദിവസം പത്രസമ്മേളനം നടത്തുന്നതിനിടെ രാജ്യത്തെ ഏറ്റവും അഴിമതി നിറഞ്ഞ സര്‍ക്കാര്‍ യെദ്യൂരപ്പയുടേതാണെന്നായിരുന്നു അമിത് ഷാ പറഞ്ഞത്. ഇത് മുതലെടുത്ത കോണ്‍ഗ്രസ് ഷായുടെ പ്രസംഗത്തിന്റെ വീഡിയോ സാമൂഹ്യമാധ്യമങ്ങളില്‍ വ്യാപകമായി പ്രചരിപ്പിച്ചിരുന്നു.