ന്യൂഡൽഹി: റഫാൽ കേസിലെ ചോർന്ന രേഖകൾ പരി​ഗണിക്കുമോ ഇല്ലയോ എന്ന കാര്യത്തിൽ സുപ്രിംകോടതി ഇന്ന് വിധി പറയും.നാളെ ആദ്യഘട്ട വോട്ടെടുപ്പ് നടക്കാനിരിക്കെ സുപ്രിം കോടതി വിധിക്ക് വളരെ പ്രാധാന്യമുണ്ട്. ചീഫ് ജസ്റ്റിസ് രഞ്ജൻ ഗൊഗോയ്, ജസ്റ്റിസ് കെ എം ജോസഫ് എന്നിവരടങ്ങുന്ന മൂന്നം​ഗ ബഞ്ചാണ് വിധി പറയുക. 

റഫാലിൽ അന്വേഷണം ആവശ്യപ്പെട്ടുള്ള ഹർജികൾ കോടതി നേരത്തേ തള്ളിയിരുന്നു. ആ കേസിനിടയിലായിരുന്നു പുതിയ രേഖകൾ ഹർജിക്കാർ കോടതിക്ക് കൈമാറിയത്. എന്നാൽ പുറത്ത് വന്ന രേഖകൾ മന്ത്രാലയത്തിൽ നിന്ന് മോഷ്ടിച്ചവയാണ് എന്നായിരുന്നു കേന്ദ്രസർക്കാർ സുപ്രിം കോടതിയിൽ വാദിച്ചത്. രേഖകൾ ചോർന്ന സംഭവം ​ഗൗരവകരമാണെന്നും രാജ്യസുരക്ഷയ്ക്ക് ഭീഷണിയാകുന്ന രേഖകൾ അക്കൂട്ടത്തിൽ ഉണ്ടെന്നും അറ്റോർണി ജനറൽ വാദിച്ചിരുന്നു. 

മുതിർന്ന അഭിഭാഷകനായ പ്രശാന്ത് ഭൂഷണ്‍,അരുൺ ഷൂറി, യശ്വന്ത് സിൻഹ എന്നിവരാണ് ഹർജി നൽകിയിരിക്കുന്നത്.