അഗര്‍ത്തല: ത്രിപുര മുഖ്യമന്ത്രിയായി ചുമതലയേറ്റതിന് ശേഷം തുടര്‍ച്ചയായി വിഡ്ഢിത്തം പറഞ്ഞ് ദേശീയ തരംഗം സൃഷ്ടിക്കുകയാണ് ബിപ്ലബ് ദേബ്. ഇത്തവണ പ്രധാനമന്ത്രി നരേന്ദ്ര മോദിയാണ് ഇര. മോദിയുടെ സഹോദരന്‍മാര്‍ ഒരാള്‍ ഓട്ടോറിക്ഷക്കാരനാണെന്നും ഒരാള്‍ പലചരക്ക് കച്ചവടക്കാരനുമാണെന്ന് ബിപ്ലബ് ദേബ് പറഞ്ഞു.

അഗര്‍ത്തലയില്‍ പരാക്രം പരവ് പരിപാടിയില്‍ സംസാരിക്കവെയാണ് മോദിയുടെ ലാളിത്യം വിളിച്ചുപറഞ്ഞത്. നരേന്ദ്രമോദി പ്രധാനമന്ത്രിയായിട്ട് നാലുവര്‍ഷമായി. അതിന് മുന്‍പ് 13 വര്‍ഷം ഗുജറാത്തിലെ മുഖ്യമന്ത്രിയായിരുന്നു. എന്നിട്ടും അദ്ദേഹത്തിന്റെ അമ്മ ഇപ്പോഴും താമസിക്കുന്നത് ഒരു ചെറിയ വീട്ടിലാണ്. മാത്രമല്ല അദ്ദേഹത്തിന്റെ സഹോദരന്‍മാര്‍ ഇപ്പോഴും നിത്യവൃത്തിക്കായി തൊഴില്‍ ചെയ്താണ് ജീവിക്കുന്നത്. ഒരാള്‍ ഓട്ടോറിക്ഷ ഓടിച്ചാണ് ഉപജീവനം നയിക്കുന്നത്. മറ്റൊരാള്‍ പലചരക്ക് കച്ചവടത്തിലൂടെയുമാണ് ജീവിതം മുന്നോട്ട് കൊണ്ടുപോകുന്നത്. ലോകത്ത് എവിടെയുണ്ടാകും ഇതുപോലെ ഒരു പ്രധാനമന്ത്രിയെന്ന് ബിപ്ലബ് ദേബ് പറയുന്നു.

നമ്മുടെ സംസ്ഥാനത്ത് ഭൂരിഭാഗവും പാവപ്പെട്ടവരാണ്. മുന്ന് വര്‍ഷം കൊണ്ട് ത്രിപുരയെ മാതൃകാ സംസ്ഥാനമാക്കുമെന്ന് ബിപ്ലബ് ദേബ് പറഞ്ഞു.