ന്യൂഡൽഹി: രാജ്യത്ത് കൊവിഡ് വ്യാപനം നവംബറിൽ മൂർധന്യത്തിലെത്തുമെന്ന്‌ ഐസിഎംഎർ പഠനം. അഞ്ച് മാസം കൂടി രോ​ഗവ്യാപനം തുടരുമെന്നും നവംബർ പകുതിയോടെ രോഗം കൊടുമുടിയിലെത്തുമെന്നും പഠനത്തിൽ ചൂണ്ടിക്കാട്ടുന്നു. ഈ അവസ്ഥയിലെത്തുമ്പോൾ ഐസോലേഷൻ വാർഡുകൾ, ഐസിയു കിടക്കകൾ, വെന്റിലേറ്ററുകൾ തുടങ്ങിയവ തികയാത്ത സാഹചര്യമുണ്ടാകുമെന്ന് പഠനം മുന്നറിയിപ്പ് നൽകുന്നു.

കോവിഡ് മുൻകരുതലിന്റെ ഭാ​ഗമായി നടപ്പാക്കിയ ലോക്ക്ഡൗൺ ​ഗുണം ചെയ്തെന്നും പഠനത്തിൽ ചൂണ്ടിക്കാട്ടി. കോവിഡ് കേസുകൾ ഏറ്റവും കൂടുന്ന സമയം 76 ദിവസം വരെ വൈകിപ്പിക്കാൻ ഇത് സഹായിച്ചു. ഈ സമയത്ത് രോഗവ്യാപനം 69- 97 % കുറയ്ക്കാൻ സാധിക്കുകയും ആരോഗ്യമേഖല 60 ശതമാനത്തോളം ശക്തിപ്പെട്ടുകയും ചെയ്തു. ‌പൊതുജനാരോഗ്യ മേഖലയിലെ സംവിധാനങ്ങൾ 80 ശതമാനം കൂട്ടിയാൽ മഹാമാരിയെ ശക്തമായി നേരിടാം പഠനം വ്യക്തമാക്കുന്നു.