മുംബൈ: വിവാദ മതപ്രഭാഷകന്‍ സാക്കിര്‍ നായികിന്റെ 16.40 കോടി രൂപയുടെ സ്വത്തുക്കള്‍ എന്‍ഫോഴ്‌സ്‌മെന്റ് ഡയറക്ട്രേറ്റ് കണ്ടുകെട്ടി. കള്ളപ്പണ നിരോധന നിയമം ഉപയോഗിച്ചാണ് ഈ നടപടി. മുംബൈ, പൂനെ എന്നിവിടങ്ങളില്‍ നായിക് പുതിയതായി സ്വന്തമാക്കിയതാണ് ഇപ്പോള്‍ കണ്ടുകെട്ടിയിരിക്കുന്ന സ്വത്തുക്കള്‍. 

ഇതോടെ സാക്കിര്‍ നായികില്‍ നിന്ന് മാത്രം 50.49 കോടി രൂപ വില മതിക്കുന്ന ആസ്തികളാണ് എന്‍ഫോഴ്‌സ്‌മെന്റ് ഡയറക്ട്രേറ്റ് പിടിച്ചെടുത്തത്. കോടികള്‍ വിലമതിക്കുന്ന ഈ ആസ്തികള്‍ സ്വന്തമാക്കാനുള്ള പണം എവിടെ നിന്നാണെന്നത് ദുരൂഹമായതിനാലാണ് കണ്ടുകെട്ടുന്നതെന്നാണ് ഇഡി വ്യക്തമാക്കിയത്. 

ഹൈന്ദവ വികാരം വ്രണപ്പെടുത്തി, ക്രിസ്ത്യാനികള്‍ക്കും വഹാബികള്‍ അല്ലാത്ത മുസ്ലിമുകള്‍ക്കും നേരെ ആക്രമണത്തിന് മറ്റുള്ളവരെ പ്രേരിപ്പിച്ചു തുടങ്ങിയ കേസുകളും നായികിനെതിരെ നേരത്തേ എടുത്തിട്ടുണ്ട്. ഈ കേസുകളില്‍ ദേശീയ കുറ്റാന്വേഷണ ഏജന്‍സി സാക്കിര്‍ നായികിനെതിരെ അന്വേഷണം നടത്തി വരികയാണ്. ഇയാള്‍ ഇപ്പോള്‍ മലേഷ്യയില്‍ ഉണ്ടെന്നാണ് റിപ്പോര്‍ട്ടുകള്‍. ഇസ്ലാമിക് റിസര്‍ച്ച് ഫൗണ്ടേഷന്റെയും പീസ് ടിവി ഫൗണ്ടേഷന്റെയും സ്ഥാപകനാണ് വിവാദ പ്രഭാഷകനായ സാക്കിര്‍ നായിക്.