സ്‌കൂള്‍ ബസില്‍ സഞ്ചരിച്ചിരുന്ന അഞ്ച് വയസുകാരായ ഇരട്ടസഹോദരങ്ങളെ പട്ടാപ്പകല്‍ തോക്ക്ചൂണ്ടി ഭീഷണിപ്പെടുത്തി തട്ടിക്കൊണ്ടുപോയി. മധ്യപ്രദേശിലെ ചിത്രക്കൂട്ട് ജില്ലയിലാണ് ഞെട്ടിപ്പിക്കുന്ന സംഭവം നടക്കുന്നത്. കുട്ടികള്‍ക്കായുള്ള തിരച്ചില്‍ പൊലീസ് ഊര്‍ജിതമാക്കി. 

ഉച്ചയ്ക്ക് ഒരുമണിയോട് അടുപ്പിച്ചാണ് സംഭവം. ബൈക്കിലെത്തിയ രണ്ടംഗ സംഘമാണ് കുട്ടികളെ തട്ടിക്കൊണ്ടുപോയത്. മുഖം മറിച്ചുവെച്ചാണ് അക്രമിസംഘം എത്തിയത്. സ്‌കൂള്‍ ബസ് വരാനിരുന്ന വഴിയിലൂടെ ഇവര്‍ ബൈക്കൊടിച്ച് നീങ്ങുന്നതും, തുടര്‍ന്ന് ബസിനകത്തുകയറി തോക്ക് ചൂണ്ടി കുട്ടികളെ കടത്തുന്നതും സിസിടിവി ദൃശ്യങ്ങളില്‍ നിന്ന് വ്യക്തം.

ചിത്രക്കൂട്ടിലെ സദ്ഗുരു പബ്ലിക് സ്‌കൂളില്‍ പഠിക്കുന്ന കുട്ടികളെയാണ് തട്ടിക്കൊണ്ടുപോയത്. അക്രമിസംഘത്തിന്റെ ലക്ഷ്യമെന്താണെന്ന് അന്വേഷിക്കുന്നുണ്ടെന്നും, കുട്ടികള്‍ക്കായുള്ള തിരച്ചില്‍ ശക്തമായി തന്നെ പുരോഗമിക്കുകയാണെന്നും പൊലീസ് പറഞ്ഞു. അന്വേഷണത്തിന്റെ ഭാഗമായി സംഭവം നടന്ന പ്രദേശത്തെ ഗതാഗതം പൂര്‍ണമായും നിര്‍ത്തിവച്ചിരിക്കുകയാണ്.