കൊല്‍ക്കത്ത: പശ്ചിമബംഗാളില്‍ രണ്ട് വനിതാ യാത്രക്കാരികള്‍ക്ക് നേരെ കാബ് ഡ്രൈവര്‍ ലൈംഗികാതിക്രമം നടത്തിയതായി പരാതി. ബാഗ് തട്ടിപ്പറിച്ചു എന്ന് കാണിച്ച് യുവതികള്‍ നല്‍കിയ പരാതിയില്‍ 40കാരനെ അറസ്റ്റ് ചെയ്തു. ആപ്പ് ഉപയോഗിച്ച് ടാക്‌സി ഓടിക്കുന്ന ഡ്രൈവറാണ് പിടിയിലായത്.

കൊല്‍ക്കത്തയിലെ സതേണ്‍ അവന്യൂ മേഖലയിലാണ് സംഭവം. 19 കാരിയുടെ പരാതിയിലാണ് നടപടി. ജോലി കഴിഞ്ഞ് വീട്ടിലേക്ക് പോകാനാണ് 19 കാരി കാബ് വിളിച്ചത്. കൂടെ 25 കാരിയായ കൂട്ടുകാരിയും ഉണ്ടായിരുന്നു. യാത്രക്കിടെ കൂട്ടുകാരിയെ വീട്ടില്‍ കൊണ്ടുപോയി വിടണമെന്ന് മോഡലായ 19കാരി ആവശ്യപ്പെട്ടു. എന്നാല്‍ പറഞ്ഞ സ്ഥലം ജിപിഎസില്‍ തെളിയുന്നില്ല എന്ന് പറഞ്ഞ് ഡ്രൈവര്‍ ആവശ്യം നിരസിച്ചു. ഇത് വാക്കേറ്റത്തിന് കാരണമായി. തുടര്‍ന്ന് ഡ്രൈവര്‍ തന്നോട് മോശമായി പെരുമാറിയെന്നാണ് പരാതിയില്‍ പറയുന്നത്.

വാഹനം നിര്‍ത്തിയ ഡ്രൈവര്‍ കാറില്‍ നിന്ന് ഇറങ്ങാന്‍ ആവശ്യപ്പെട്ടു. മാന്യമായി പെരുമാറാന്‍ പെണ്‍കുട്ടി ഡ്രൈവറോട് ആവശ്യപ്പെട്ടു. ഇതില്‍ പ്രകോപിതനായ ഡ്രൈവര്‍ അണുനാശിനി മുഖത്ത് തളിച്ചതായി പരാതിയില്‍ പറയുന്നു. തുടര്‍ന്ന് ബാഗ് തട്ടിപ്പറിച്ച് കാറില്‍ ഡ്രൈവര്‍ കടന്നുകളഞ്ഞതായും പരാതിയില്‍ പറയുന്നതായി പൊലീസ് പറയുന്നു. ആരോപണം ഡ്രൈവര്‍ നിഷേധിച്ചു.