അമേഠി : കേന്ദ്രമന്ത്രി സ്മൃതി ഇറാനിയുടെ പ്രചാരണത്തില്‍ സഹായിയായിരുന്ന ബിജെപി പ്രവര്‍ത്തകന്‍ വെടിയേറ്റ് മരിച്ചു. അമേഠിയിലെ ബറൗലിയയിലെ മുന്‍ ഗ്രാമമുഖ്യന്‍ കൂടിയായ സുരേന്ദ്രസിംഗാണ് കൊല്ലപ്പെട്ടത്. ശനിയാഴ്ച രാത്രിയാണ് ഇദ്ദേഹത്തിന് വെടിയേറ്റത്. 

സുരേന്ദ്രസിംഗിനെ വീട്ടിലെത്തിയാണ് ആക്രമികള്‍ വെടിയുതിര്‍ത്തത്. അദ്ദേഹത്തെ ഉടന്‍ തന്നെ ലഖ്‌നൗവിലെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. കൊലപാതകത്തിന്റെ കാരണം വ്യക്തമല്ലെന്ന് പൊലീസ് പറഞ്ഞു. 

ലോക്‌സഭ തെരഞ്ഞെടുപ്പില്‍ സ്മൃതി ഇറാനിയുടെ പ്രചാരണത്തില്‍ സുരേന്ദ്രസിംഗ് സജീവമായി രംഗത്തുണ്ടായിരുന്നു. പ്രചാരണ റാലികളില്‍ ബിജെപി നേതാക്കള്‍ സുരേന്ദ്രസിംഗിനെ പേരെടുത്ത് പറഞ്ഞ് പുകഴ്ത്തിയിരുന്നു. 

പുലര്‍ച്ചെ മൂന്നുമണിയോടെയാണ് വെടിയേറ്റതെന്നും, സംഭവത്തില്‍ പങ്കുണ്ടെന്ന് സംശയിക്കുന്ന ഏതാനും പേരെ കസ്റ്റഡിയില്‍ എടുത്തതായും അമേഠി എസ്പി രാജേഷ് കുമാര്‍ പറഞ്ഞു. ഗ്രാമമുഖ്യനായിരുന്ന സുരേന്ദ്രസിംഗിന് മുന്‍ കേന്ദ്രമന്ത്രി മനോഹര്‍ പരീക്കറാണ് ബിജെപി അംഗത്വം നല്‍കി സ്വീകരിച്ചത്.