കുർണൂൽ: ആന്ധ്രപ്രദേശിൽ കോവിഡ് ബാധിതൻറെ മൃതദേഹം കൈമാറിയതിൽ ഗുരുതര വീഴ്ച സംഭവിച്ചതായി റിപ്പോർട്ടുകൾ. കോവിഡ് ബാധിച്ച് മരിച്ചയാളുടെ മൃതദേഹം ഹൃദ്രോഗത്തെ തുടർന്ന് മരിച്ച നന്ത്യാൽ സ്വദേശിയുടെ ബന്ധുക്കൾക്കാണ് വിട്ടുനൽകിയത്.

കുർണൂർ സർക്കാർ ജനറൽ ആശുപത്രിയിലാണ് സംഭവം. മരിച്ച നന്ത്യാൽ സ്വദേശിയുടെ മൃതദേഹം കൊവിഡ് പ്രോട്ടോക്കോൾ അനുസരിച്ച് സംസ്കരിക്കുകയും ചെയ്തു.

സംഭവത്തിൽ ജില്ലാ കലക്ടർ അന്വേഷണത്തിന് ഉത്തരവിട്ടു. പേരിലെ സാമ്യമാണ് പിഴവിന് കാരണമെന്നാണ് ആശുപത്രി അധികൃതരുടെ വിശദീകരണം. ആന്ധ്രപ്രദേശിൽ ഏറ്റവും കൂടുതൽ കോവിഡ് രോഗികളുളള ജില്ലയാണ് കുർണൂൽ. 16 പേരാണ് ജില്ലയിൽ ഇതുവരെ കോവിഡ് ബാധിച്ച് മരിച്ചത്.