കൊച്ചി: മഹാരാജാസ് കോളജില്‍ മന്ത്രി റോജി എം ജോണിനെ തടഞ്ഞ സംഭവത്തില്‍ 10 എസ്എഫ്‌ഐ പ്രവര്‍ത്തകര്‍ക്ക് മുന്‍കൂര്‍ ജാമ്യം. എറണാകുളം പ്രിന്‍സിപ്പല്‍ സെഷന്‍സ് കോടതിയുടേതാണ് വിധി. കോളജ് യൂണിയന്‍ ചെയര്‍പേഴ്‌സണ്‍ പ്രണീല്‍രാജ്, വൈസ് ചെയര്‍പേഴ്‌സണ്‍ നഫീസത്തുല്‍ മിസ്രിയ തുടങ്ങി 10 പേര്‍ക്കാണ് മുന്‍കൂര്‍ ജാമ്യം കിട്ടിയത്. അന്വേഷണവുമായി സഹകരിക്കണം, അന്വേഷണോദ്യോഗസ്ഥര്‍ എപ്പോള്‍ വിളിച്ചാലും ഹാജരാകണം എന്നീ ഉപാധികളിന്മേലാണ് കോടതി ജാമ്യം അനുവദിച്ചത്.
കാലടി സര്‍വ്വകലാശാലയിലെ എസ്എഫ്‌ഐ വിദ്യാര്‍ഥികളുടെ സസ്‌പെന്‍ഷന്‍ പിന്‍വലിക്കണമെന്ന് ആവശ്യപ്പെട്ടാണ് മഹാരാജാസിലെ ബിരുദദാന ചടങ്ങിനിടെ എസ്എഫ്‌ഐ പ്രവര്‍ത്തകര്‍ മന്ത്രിയെ തടഞ്ഞത്. പൊതുപരിപാടി തടസ്സപ്പെടുത്തിയതിനുള്ള വകുപ്പുകള്‍ സഹിതം സെന്‍ട്രല്‍ പൊലീസാണ് 12 എസ്എഫ്‌ഐ പ്രവര്‍ത്തകര്‍ക്കെതിരെ കേസെടുത്തത്. ഇതില്‍ എറണാകുളത്തിന്റെ ചുമതലയുള്ള സിദ്ധാര്‍ത്ഥ് എന്ന എസ്എഫ്‌ഐ പ്രവര്‍ത്തകനും മറ്റൊരു വിദ്യാര്‍ഥിക്കും നേരത്തെ ജാമ്യം ലഭിച്ചിരുന്നു. പ്രതിഷേധിച്ച വിദ്യാര്‍ഥികളെ 10 ദിവസത്തേക്ക് കോളജില്‍ നിന്ന് സസ്‌പെന്‍ഡ് ചെയ്തിരുന്നു.
കണ്ണൂരിലും റോജി എം ജോണിനെതിരെ എസ്എഫ്‌ഐ പ്രതിഷേധം ഉണ്ടായി. മാടായി ഗവണ്‍മെന്റ് എഞ്ചിനിയറിംഗ് കോളജിലെ പരിപാടിക്കിടെ സദസില്‍ നിന്നും ബാനര്‍ ഉയര്‍ത്തിയായിരുന്നു പ്രതിഷേധം. സംസാരിക്കുന്നതിനായി മന്ത്രി വേദിയില്‍ എഴുന്നേറ്റ് നിന്ന സമയത്ത് 'അതുകൊണ്ടരിശം തീരാഞ്ഞവനാപ്പുരയുടെ ചുറ്റും മണ്ടി നടന്നു' എന്ന കുഞ്ചന്‍ നമ്പ്യാരുടെ കവിതാശകലം ബാനറില്‍ ഉയര്‍ത്തിയായിരുന്നു പ്രതിഷേധം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates