കോഴിക്കോട്: എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശനെതിരെ വിമര്‍ശനവുമായി എഴുത്തുകാരനും പുരോഗമന കലാസാഹിത്യ സംഘം (പുകസ) സംസ്ഥാന വൈസ് പ്രസിഡന്റുമായ അശോകന്‍ ചരുവില്‍. മുസ്ലിം ജനതക്കുള്ളതിനേക്കാള്‍ കൂടുതല്‍ വെറുപ്പാണ് ഈഴവര്‍ക്ക് വെള്ളാപ്പള്ളിയോടുള്ളതെന്ന് അശോകന്‍ ചരുവില്‍ പറഞ്ഞു. നിയമസഭാ തെരഞ്ഞെടുപ്പില്‍ സിപിഎമ്മിന്റെ തോല്‍വിയെക്കുറിച്ച് മാധ്യമപ്രവര്‍ത്തകന്‍ കെ ജെ ജേക്കബ് എഴുതിയ ഫെയ്‌സ്ബുക്ക് കുറിപ്പിന് കമന്റിട്ടിരിക്കുകയാണ് അശോകന്‍ ചരുവില്‍.

കമന്റ് ഇങ്ങനെ:

2016ല്‍ നാരായണഗുരുവിനെ മുന്‍നിര്‍ത്തി വെള്ളാപ്പിള്ളിയിസത്തെ തോല്‍പ്പിച്ചു കൊണ്ടാണ് ഇടതുപക്ഷം വിജയിച്ചത്. നാടെങ്ങും നടത്തിയ 'തനിക്ക് ജാതിയും മതവുമില്ല' വിളംബരത്തിന്റെ ശതാബ്ദി ഓര്‍ക്കുക. 2026 ല്‍ ഈഴവ പിന്നാക്ക വിഭാഗങ്ങളില്‍ നിന്നും ബിജെപിയിലേക്കുള്ള ഒഴുക്ക് തടയാമെന്ന് കരുതിയാവാം വെളളാപ്പളളിയെ കൂടെ നിര്‍ത്തിയത്. വെള്ളാപ്പള്ളി ഉള്ള സ്ഥലത്ത് ഗുരു ഉണ്ടാവുകയില്ല എന്ന വസ്തുത നമ്മള്‍ മറന്നു. മുസ്ലിം ജനതക്കുള്ളതിനേക്കാള്‍ കൂടുതല്‍ വെറുപ്പാണ് ഈഴവര്‍ക്ക് വെള്ളാപ്പള്ളിയോടുള്ളത്. കൂടെ കിടക്കുന്നവര്‍ക്കല്ലേ രാപ്പനി അറിയൂ?

തെരഞ്ഞെടുപ്പിന് മുമ്പ് വെള്ളാപ്പള്ളി നടേശന്‍ നടത്തിയ വിദ്വേഷ പ്രസ്താവനയെക്കുറിച്ചാണ് അശോകന്‍ ചരുവിലിന്റെ പ്രതികരണം. ഈ പ്രസ്താവന വിവാദമാവുകയും ചെയ്തു. വെള്ളാപ്പള്ളിയോട് അടുത്ത സിപിഎമ്മിന്റെ നിലപാട് പരാജയത്തിന്റെ കാരണമായതായാണ് വിലയിരുത്തല്‍.