കൊല്ലം: ശൂരനാട് തെക്ക് കുമരൻചിറ ഉത്സവത്തിനിടെ ബിജെപി ജില്ലാ പ്രസിഡന്റിന്റെ മകനെ ആർഎസ്എസുകാർ വളഞ്ഞിട്ട് തല്ലി തല അടിച്ചു പൊട്ടിച്ചു. കൊല്ലം ഈസ്റ്റ് ജില്ലാ പ്രസിഡന്റ് രാജി പ്രസാദിന്റെ മകൻ ശൂരനാട് തെക്ക് കിടങ്ങയം വലിയത്ത് വടക്കേതിൽ പൃഥ്വിരാജിനാണ് (23) മർദ്ദനമേറ്റത്. ഇടിവള കൊണ്ടുള്ള മർദ്ദനത്തിലാണ് പൃഥ്വിരാജിന്റെ തലയ്ക്ക് പരിക്കേറ്റത്. ഇയാളെ ആശുപത്രിയിൽ പ്രവേശിപ്പിച്ചു.

ഉത്സവത്തിന്റെ കെട്ടുകാഴ്ചക്കിടെ ചൊവ്വാഴ്ച രാത്രി 10.30നാണ് സംഭവം. പൃഥ്വിരാജിനൊപ്പം ഉണ്ടായിരുന്ന ബന്ധുവും ഭിന്നശേഷിക്കാരനുമായ യുവാവിനെ മർദ്ദിച്ചത് ചോദ്യം ചെയ്തതിനെ ചൊല്ലിയുള്ള തർക്കമാണ് സംഘർഷത്തിൽ കലാശിച്ചത്.

സമീപവാസികളായ ആകാശ്, അച്ചു, നന്ദു, കിച്ചു, വിഷ്ണു എന്നിവർ ഉൾപ്പെടെ കണ്ടാലറിയുന്ന പത്തോളം പേർക്കെതിരെ ശൂരനാട് പൊലീസ് കേസെടുത്തു. ഇവർ ഒളിവിലാണ്. സംഭവത്തിൽ രാഷ്ട്രീയ കാരണങ്ങൾ ഇല്ലെന്നു പൊലീസ് പറഞ്ഞു.