പത്തനംതിട്ട: പത്തനംതിട്ടയിലെ നാരങ്ങാനം പഞ്ചായത്തില്‍ ബിജെപിക്ക് തിരിച്ചടി. ബിജെപി പഞ്ചായത്ത് ഭരണത്തിനെതിരെ കോണ്‍ഗ്രസ് കൊണ്ടു വന്ന അവിശ്വാസ പ്രമേയം പാസ്സായി. യുഡിഎഫിന്റെ അവിശ്വാസ പ്രമേയത്തെ എല്‍ഡിഎഫ് പിന്തുണയ്ക്കുകയായിരുന്നു.

പഞ്ചായത്തില്‍ യുഡിഎഫിനും ബിജെപിക്കും ആറു വീതം അംഗങ്ങളും സിപിഎമ്മിന് രണ്ട് അംഗങ്ങളുമാണ് ഉണ്ടായിരുന്നത്. പ്രശസ്തമായ കടമ്മനിട്ട ഗ്രാമം ഉള്‍പ്പെടുന്ന നാരങ്ങാനം പഞ്ചായത്തില്‍ നറുക്കെടുപ്പിലൂടെയാണ് ബിജെപി അധികാരത്തിലേറിയത്.

പ്രസിഡന്റ് സ്ഥാനത്തേക്കുള്ള നറുക്കെടുപ്പില്‍ ബിജെപിയും, വൈസ് പ്രസിഡന്റ് സ്ഥാനത്തേക്ക് നടന്ന നറുക്കെടുപ്പില്‍ കോണ്‍ഗ്രസുമാണ് വിജയിച്ചിരുന്നത്. എല്‍ഡിഎഫുമായുള്ള കൂട്ടുകെട്ടല്ലെന്നും, ഭരണസമിതിക്കെതിരായ പ്രതികരണം എന്ന നിലയിലാണ് ഇടതുമുന്നണി പിന്തുണച്ചതെന്നും യുഡിഎഫ് അംഗങ്ങള്‍ പറഞ്ഞു.

സിപിഎമ്മും കോണ്‍ഗ്രസും ചേര്‍ന്ന് ഇന്‍ഡി മുന്നണിയായി നാരങ്ങാനം പഞ്ചായത്ത് ഭരണം അട്ടിമറിക്കുകയായിരുന്നുവെന്ന് ബിജെപി ആരോപിച്ചു. ബിജെപി നല്ല നിലയില്‍ പഞ്ചായത്ത് ഭരണം നടത്തിവരികയായിരുന്നു. കുത്തിത്തിരിപ്പ് നടത്തി ബിജെപിയുടെ ഭരണം വലിച്ചു താഴെയിടാനുള്ള ശ്രമത്തിന്റെ ഭാഗമായിട്ടാണ് യുഡിഎഫും എല്‍ഡിഎഫും യോജിച്ചതെന്നും ബിജെപി ആരോപിക്കുന്നു.