മലപ്പുറം: വീട്ടുമുറ്റത്തുള്ള കിണറിൽ വെള്ളം തിളയ്ക്കുന്ന പ്രതിഭാസം. നിലമ്പൂർ മുതുകാട് തെക്കുംപാടത്താണ് കിണറിൽ വെള്ളം തിളയ്ക്കുന്ന പ്രതിഭാസം കണ്ടെത്തിയത്. കിണർ റിങ്ങുകൾ ചരിഞ്ഞ നിലയിൽ ആണ്. 

താഴത്തെ വീട്ടിൽ മിനി ഗോപിയുടെ വീട്ടുമുറ്റത്തെ കിണറിലെ വെള്ളമാണ് തിളച്ചത്. ഇന്നലെ പുലർച്ചെ നാലിന് വെള്ളം കോരിയപ്പോൾ ചൂട് അനുഭവപ്പെട്ടു. നേരം പുലർന്ന് നോക്കിയപ്പോൾ കിണറിൽ നേരിയ തോതിൽ വെള്ളം തിളക്കുന്നുണ്ടായിരുന്നു. മോട്ടർ കേടുവരുകയും ചെയ്തു. 

നഗരസഭാ കൗൺസിലർ പാലോളി മെഹബൂബ്, ജല അതോറിറ്റി ഫീൽഡ് ഓഫീസർ കെ അജീഷ്, ആശാ വർക്കർ പി പ്രസന്ന എന്നിവർ സ്ഥലത്തെത്തി. വെള്ളത്തിന്റെ സാമ്പിൾ ഗുണ നിലവാര പരിശോധനയ്ക്ക് ജല അതോറിറ്റി ലാബിലേക്ക് അയച്ചു.