തിരുവനന്തപുരം: തന്റെ കുടുംബം തകര്‍ന്നതിന് കാരണക്കാരന്‍ ഉമ്മന്‍ ചാണ്ടിയാണെന്ന ഗതാഗത മന്ത്രി കെ ബി ഗണേഷ് കുമാറിന്റെ ആരോപണത്തില്‍ മറുപടിയുമായി ചാണ്ടി ഉമ്മന്‍ എംഎല്‍എ. ഈ വിഷയത്തില്‍ ഗണേഷ് കുമാര്‍ സ്വന്തം മനസാക്ഷിയോടാണ് ചോദ്യങ്ങള്‍ ഉന്നയിക്കേണ്ടത് എന്നാണ് ചാണ്ടി ഉമ്മന്റെ പ്രതികരണം. താന്‍ കഴിഞ്ഞ ദിവസം പറഞ്ഞ കാര്യങ്ങളിലെ സത്യം ജനങ്ങള്‍ക്കറിയാം. സത്യവിരുദ്ധമായി ഒന്നും പറഞ്ഞിട്ടില്ല. ആരെയും വ്യക്തിപരമായി അധിക്ഷേപിക്കുന്ന തരത്തില്‍ ഒരു പരാമര്‍ശവും നടത്താന്‍ ഉദ്ദേശിക്കുന്നില്ലെന്നും ചാണ്ടി ഉമ്മന്‍ മാധ്യമങ്ങളോട് പ്രതികരിച്ചു. ഗണേഷ്‌കുമാറിന്റെ പ്രതികരണത്തിന് പിന്നാലെയാണ് ചാണ്ടി ഉമ്മന്റെ വിശദീകരണം.

മരിച്ചുപോയ പിതാവിനെ വിവാദത്തിലേക്ക് കൊണ്ടുപോകാന്‍ താത്പര്യമില്ല. ഉമ്മന്‍ ചാണ്ടിക്ക് എതിരായ ആ പരാമര്‍ശം തെറ്റായിരുന്നോ എന്ന് ഗണേഷ് കുമാര്‍ ചിന്തിക്കട്ടെ. ഗണേഷ് കുമാറിനെ പോലുള്ള ഒരാളില്‍ നിന്ന് പ്രതീക്ഷ കാര്യമല്ല ഉമ്മന്‍ ചാണ്ടിയുടെ കാര്യത്തില്‍ സംഭവിച്ചതെന്നത് മാത്രമാണ് താന്‍ പറഞ്ഞതെന്നും ചാണ്ടി ഉമ്മന്‍ വിശദീകരിച്ചു.

കഴിഞ്ഞ ദിവസം പത്തനാപുരത്തെ പൊതുവേദിയില്‍ വച്ച് സോളാര്‍ കേസ് പരാമര്‍ശിച്ച് ഗണേഷ് കുമാറിനെതിരെ ചാണ്ടി ഉമ്മന്‍ നടത്തിയ പ്രതികരണങ്ങള്‍ക്ക് പിന്നാലെയാണ് പരസ്പരം ആക്ഷേപങ്ങള്‍ ഉന്നയിക്കുന്ന നിലയിലേക്ക് സാഹചര്യം എത്തിച്ചത്. ഉമ്മന്‍ ചാണ്ടിയെ താന്‍ ചതിച്ചെന്ന ചാണ്ടി ഉമ്മന്റെ പരാമര്‍ശം തെരഞ്ഞെടുപ്പ് അടുത്തപ്പോള്‍ ഉണ്ടായ പുതിയ കഥയാണെന്നായിരുന്നു ആരോപണങ്ങള്‍ക്ക് ഗണേഷ് കുമാറിന്റെ മറുപടി.

ക്രിസ്ത്യന്‍ വിഭാഗത്തെ തനിക്കെതിരെ തിരിക്കാന്‍ ചാണ്ടി ഉമ്മന്‍ വര്‍ഗീയത പറയുകയാണെന്നും ഗണേഷ് കുമാര്‍ ആരോപിച്ചിരുന്നു. താന്‍ ഉമ്മന്‍ചാണ്ടിയെ ചതിച്ചുവെന്ന് ഉമ്മന്‍ചാണ്ടിപോലും പറഞ്ഞിട്ടില്ല. ഒരു കുടുംബ വഴക്കിന് മന്ത്രിസ്ഥാനം രാജിവെപ്പിച്ചു. തന്റെ രണ്ടു മക്കളെയും വേര്‍പിരിച്ചത് ഉമ്മന്‍ചാണ്ടിയാണ്. തനിക്കും കുറേ പറയാനുണ്ടെന്നും അദ്ദേഹം പ്രതികരിച്ചു. 2014 ലെ ലോകസഭാ തെരഞ്ഞെടുപ്പ് കഴിഞ്ഞു മന്ത്രിസ്ഥാനം തരാം എന്ന് പറഞ്ഞിട്ട് എന്താണുണ്ടായത്. കാര്യങ്ങള്‍ പറയുമ്പോള്‍ അന്തസ്സ് വേണം. ഒരു കേസ് കൊട്ടാരക്കര കോടതിയിലുണ്ട്. ഒരാള്‍ പോലും അതില്‍ ഹാജരാവുന്നില്ല. ചാണ്ടി ഉമ്മന്‍ നിര്‍ത്തുന്നതാണ് അദ്ദേഹത്തിന് നല്ലത്. പത്തനാപുരത്ത് വികസനമുണ്ട് പുതുപ്പള്ളിയില്‍ എന്താണ് ഉള്ളത്. മേലില്‍ ഇത്തരം കാര്യങ്ങള്‍ പറയരുതെന്നും മന്ത്രി ചാണ്ടി ഉമ്മന് മുന്നറിയിപ്പ് നല്‍കിയിരുന്നു.