ആലപ്പുഴ: ചെങ്ങന്നൂര്‍ എസ്എച്ച്ഒയെ അപകീര്‍ത്തിപ്പെടുത്തുന്ന തരത്തില്‍ വിഡിയോ പ്രചരിപ്പിച്ച യുവതിക്കെതിരെ കേസെടുത്തു. മാവേലിക്കര മാങ്കാംകുഴി സ്വദേശിനിയായ യുവതിക്കെതിരെയാണ് കേസെടുത്തത്. പണിമുടക്ക് ദിനത്തില്‍ എസ്എച്ച്ഒ എ സി വിപിന്‍ ബര്‍മുഡയും ടീ ഷര്‍ട്ടും ധരിച്ച് സ്റ്റേഷനില്‍ എത്തിയ ദൃശ്യങ്ങള്‍ അപകീര്‍ത്തികരമായ പരാമര്‍ശത്തോടെ പ്രചരിപ്പിച്ചെന്നാണ് കേസ്.

ഭര്‍തൃഗൃഹത്തില്‍നിന്ന് ഇറങ്ങിപ്പോയ സ്ത്രീയെ കണ്ടെത്തി കൊണ്ടുവന്നശേഷം ബന്ധുക്കള്‍ക്കൊപ്പം അയക്കുന്നതിനായി ചെങ്ങന്നൂര്‍ സ്റ്റേഷനില്‍ എത്തിച്ചിരുന്നു. പുലര്‍ച്ചേ വിവരമറിഞ്ഞ് ഭര്‍ത്താവും മാതാവും സ്റ്റേഷനിലെത്തിയപ്പോള്‍ യുവതി ഇവരുമായി വഴക്കായി. ഇക്കാര്യം ഡ്യൂട്ടിയിലുണ്ടായിരുന്ന പൊലീസ് ഉദ്യോഗസ്ഥര്‍ എസ്എച്ച്ഒയെ അറിയിച്ചു.

വ്യായാമത്തിലായിരുന്ന എസ്എച്ച്ഒ യൂണിഫോം ധരിക്കാതെ വേഗത്തില്‍ സ്റ്റേഷനിലെത്തി. ഈസമയം തനിക്കനുകൂലമായ തീരുമാനം ലഭിക്കാതിരുന്ന ഒരു വ്യക്തി സ്റ്റേഷനിലെ പ്രവര്‍ത്തനങ്ങളുടെ വിഡിയോ ഫോണില്‍ ചിത്രീകരിക്കുകയും മോശം പരമാര്‍ശങ്ങളോടെ സാമൂഹ്യ മാധ്യമത്തിലൂടെ പ്രചരിപ്പിക്കുകയും ചെയ്‌തെന്നാണ് കേസ്.

വിഡിയോ പ്രചരിപ്പിച്ച മറ്റുള്ളവര്‍ക്കും മോശം കമന്റിട്ടവര്‍ക്കുമെതിരെ നടപടിയെടുക്കുമെന്നും പൊലീസ് പറഞ്ഞു. രാവിലെ വ്യായാമത്തിന് പോയപ്പോള്‍ സ്റ്റേഷനില്‍ അടിയന്തരമായ ആവശ്യമുണ്ടായതിനാലാണ് വ്യായാമ വസ്ത്രത്തില്‍ എത്തിയതെന്നാണ് എസ്എച്ച്ഒയുടെ വിശദീകരണം. പ്രശ്നം പരിഹരിച്ചയുടന്‍ മടങ്ങി ക്വാര്‍ട്ടേഴ്സിലെത്തി യൂണിഫോം ധരിച്ച് എസ്എച്ച്ഒ മടങ്ങിയെത്തിയെന്നും പറയുന്നു.