തിരുവനന്തപുരം: മുള്ളൻപന്നിയെ ഇരുമ്പു പൈപ്പ് കൊണ്ടു അടിച്ചു കൊന്ന കേസിൽ സിപിഎം നേതാവും വെള്ളനാട് പഞ്ചായത്ത് പ്രസിഡന്റുമായ വെള്ളനാട് ശശിയുടെ ജാമ്യാപേക്ഷ കോടതി തള്ളി. തിരുവനന്തപുരം പ്രിൻസിപ്പൽ സെഷൻസ് കോടതിയാണ് ഹർജി പരി​ഗണിച്ചത്. ഉത്തരവാദിത്വമുള്ള പദവിയിൽ ഇരിക്കുന്ന വ്യക്തി ചെയ്ത പ്രവൃത്തിയെ ചെറുതായി കാണാൻ കഴിയില്ലെന്നു കോടതി വ്യക്തമാക്കി.

സ്ഥലത്തുണ്ടായിരുന്ന ജനങ്ങളുടേയും കുട്ടികളുടേയും ജീവൻ രക്ഷിക്കാൻ ചെയ്ത പ്രവൃത്തിയാണെന്നായിരുന്നു പ്രതിഭാ​ഗം വാദിച്ചത്. പഞ്ചായത്ത് പ്രസിഡന്റ് എന്ന നിലയിൽ ജനങ്ങൾക്കു മാതൃയാകേണ്ട വ്യക്തി നിയമം പാലിക്കാത്ത സാഹചര്യം ​ഗൗരവമായി കാണണമെന്ന പ്രോസിക്യൂഷൻ വാദം കോടതി പരി​ഗണിച്ചു.

കഴിഞ്ഞ മാസം 28ന് വെള്ളനാട് വാളിയറ ആശ്രാമത്തിനടുത്തുള്ള അരുൺ കുമാറിന്റെ വീട്ടുവളപ്പിലെത്തിയ മുള്ളൻ പന്നിയെ ശശി അടിച്ചു കൊന്നുവെന്നാണ് കേസ്. വനം വകുപ്പാണ് കേസെടുത്തത്. ശശിക്കെതിരെ ജാമ്യമില്ലാ വകുപ്പുകൾ ചുമത്തിയാണ് കേസെടുത്തത്. എന്നാൽ അറസ്റ്റ് ചെയ്തിട്ടില്ല.