പല കുടുംബങ്ങളിലും അമ്മായിയമ്മയുടെ മരണ ശേഷം സ്വര്‍ണം ആര്‍ക്കെന്ന തര്‍ക്കം ഉണ്ടാകാറുണ്ട്. മരുമക്കള്‍ക്കും മക്കള്‍ക്കും ഇടയില്‍ പലപ്പോഴും അസ്വാരസ്യങ്ങള്‍ കാരണമാകുന്ന ഈ വിഷയത്തില്‍ കൃത്യമായ നിയമങ്ങള്‍ നിലവിലുണ്ട്. പലപ്പോഴും ഇത്തരം തര്‍ക്കങ്ങള്‍ കോടതി കയറാറുമുണ്ട്. വൈകാരികമായ ബന്ധങ്ങള്‍ക്കപ്പുറം ഇന്ത്യന്‍ നിയമവ്യവസ്ഥ ഈ വിഷയത്തില്‍ നല്‍കുന്ന വ്യക്തത എന്താണെന്ന് നോക്കാം.

ഒസ്യത്ത് ഉണ്ടെങ്കില്‍

അമ്മായിയമ്മ തന്റെ സ്വര്‍ണം ഇന്ന് ആള്‍ക്ക് നല്‍കണം എന്ന് ഒസ്യത്ത് എഴുതിവെച്ചിട്ടുണ്ടെങ്കില്‍ ആഭരണങ്ങള്‍ ആ വ്യക്തിക്ക് തന്നെ ലഭിക്കും. അത് മക്കള്‍ക്കോ, മരുമക്കള്‍ക്കോ പേരക്കുട്ടിക്കോ മറ്റേതെങ്കിലും വ്യക്തിക്കോ ആകാം.

ഒസ്യത്ത് ഇല്ലെങ്കില്‍

ഒസ്യത്ത് എഴുതിവെക്കാതെയാണ് മരണമെങ്കില്‍ ആ വ്യക്തിയുടെ മതം അനുസരിച്ചുള്ള പിന്‍തുടര്‍ച്ചാവകാശ നിയമങ്ങളാണ് ബാധകമാവുക.

ഹിന്ദു നിയമപ്രകാരം

ഒരു ഹിന്ദു സ്ത്രീ ഒസ്യത്ത് എഴുതാതെ മരിച്ചാല്‍ ആദ്യ അവകാശം മക്കള്‍ക്കും ഭര്‍ത്താവിനുമാണ്. ആണ്‍മക്കള്‍ക്കും പെണ്‍മക്കള്‍ക്കും തുല്യ അവകാശമാണുള്ളത്. ഭര്‍ത്താവോ മക്കളോ ജീവിച്ചിരിക്കുന്നില്ലെങ്കില്‍ മാത്രമാണ് മറ്റ് ബന്ധുക്കള്‍ക്കാണ് അവകാശം.

(1) ഒസ്യത്ത് (വില്‍പ്പത്രം) എഴുതാതെ മരിക്കുന്ന ഒരു ഹിന്ദു സ്ത്രീയുടെ സ്വത്തുക്കള്‍ താഴെ പറയുന്ന ക്രമത്തില്‍, സെക്ഷന്‍ 16-ല്‍ വിവരിച്ചിരിക്കുന്ന നിയമങ്ങള്‍ പ്രകാരം കൈമാറ്റം ചെയ്യപ്പെടേണ്ടതാണ്:

(എ) ഒന്നാമതായി, മക്കള്‍ക്കും (മരിച്ചുപോയ മകന്റെയോ മകളുടെയോ മക്കള്‍ ഉള്‍പ്പെടെ), ഭര്‍ത്താവിനും;

(ബി) രണ്ടാമതായി, ഭര്‍ത്താവിന്റെ അനന്തരാവകാശികള്‍ക്ക്;

(സി) മൂന്നാമതായി, മാതാവിനും പിതാവിനും

(ഡി) നാലാമതായി, പിതാവിന്റെ അനന്തരാവകാശികള്‍ക്ക്;

(ഇ) അവസാനമായി, മാതാവിന്റെ അനന്തരാവകാശികള്‍ക്ക്.

(2) ഉപവിഭാഗം (1)ല്‍ എന്ത് തന്നെ പറഞ്ഞിട്ടുണ്ടെങ്കിലും:

(എ) ഒരു ഹിന്ദു സ്ത്രീക്ക് തന്റെ പിതാവില്‍ നിന്നോ മാതാവില്‍ നിന്നോ പാരമ്പര്യമായി ലഭിച്ച ഏതെങ്കിലും സ്വത്തുക്കള്‍, മരിക്കുമ്പോള്‍ മക്കളോ (മരിച്ചുപോയ മകന്റെയോ മകളുടെയോ മക്കള്‍ ഉള്‍പ്പെടെ) ഇല്ലെങ്കില്‍, ഉപവിഭാഗം (1)ല്‍ പറഞ്ഞിരിക്കുന്ന മറ്റ് അവകാശികള്‍ക്ക് ലഭിക്കുന്നതിന് പകരം പിതാവിന്റെ അനന്തരാവകാശികള്‍ക്ക് ലഭിക്കുന്നതാണ്.

(ബി) ഒരു ഹിന്ദു സ്ത്രീക്ക് തന്റെ ഭര്‍ത്താവില്‍ നിന്നോ അമ്മായിയപ്പനില്‍ നിന്നോ പാരമ്പര്യമായി ലഭിച്ച ഏതെങ്കിലും സ്വത്തുക്കള്‍, മരിക്കുമ്പോള്‍ മക്കളോ (മരിച്ചുപോയ മകന്റെയോ മകളുടെയോ മക്കള്‍ ഉള്‍പ്പെടെ) ഇല്ലെങ്കില്‍, ഉപവിഭാഗം (1)ല്‍ പറഞ്ഞിരിക്കുന്ന മറ്റ് അവകാശികള്‍ക്ക് ലഭിക്കുന്നതിന് പകരം ഭര്‍ത്താവിന്റെ അനന്തരാവകാശികള്‍ക്ക് ലഭിക്കുന്നതാണ്.

മുസ്ലീം നിയമപ്രകാരം

മരിച്ച സ്ത്രീയുടെ സ്വത്തില്‍ ഭര്‍ത്താവിനും മക്കള്‍ക്കും മാതാപിതാക്കള്‍ക്കും കൃത്യമായ ഓഹരികള്‍ നിശ്ചയിച്ചിട്ടുണ്ട്. മുസ്ലീം നിയമപ്രകാരം ആണ്‍മക്കള്‍ക്കാണ് പെണ്‍മക്കളേക്കാള്‍ ഇരട്ടി ഓഹരി ലഭിക്കുക. ഇവിടെയും മരുമക്കള്‍ക്ക് നേരിട്ട് അവകാശമില്ല.

മുസ്ലിം നിയമപ്രകാരം ഒരു സ്ത്രീയുടെ സ്വത്ത് അവകാശത്തെക്കുറിച്ചുള്ള പൊതുവായ വിവരങ്ങള്‍ താഴെ പറയുന്നവയാണ്:

അവകാശികള്‍: ഒരു മുസ്ലിം സ്ത്രീ മരിക്കുമ്പോള്‍ അവരുടെ സ്വത്തില്‍ ഭര്‍ത്താവിനും, മക്കള്‍ക്കും, മാതാപിതാക്കള്‍ക്കും നിശ്ചിത ഓഹരികള്‍ക്ക് അവകാശമുണ്ട്.

ഓഹരി വിഭജനം: പൊതുവായ നിയമപ്രകാരം ആണ്‍മക്കള്‍ക്ക് പെണ്‍മക്കളേക്കാള്‍ ഇരട്ടി ഓഹരി ലഭിക്കുന്നു.

മഹര്‍: ഒരു സ്ത്രീക്ക് വിവാഹസമയത്ത് ലഭിച്ച മഹര്‍ അവരുടെ പൂര്‍ണ്ണമായ സ്വകാര്യ സ്വത്താണ്, അതില്‍ മറ്റാര്‍ക്കും അവകാശമില്ല.

വില്‍പ്പത്രം (will): ഒരാള്‍ക്ക് തന്റെ ആകെ സ്വത്തിന്റെ മൂന്നിലൊന്ന് (1/3) ഭാഗം മാത്രമേ വില്‍പ്പത്രം വഴി നല്‍കാന്‍ സാധിക്കൂ. ബാക്കിയുള്ളവ നിയമപരമായ അവകാശികള്‍ക്ക് കൃത്യമായ ഓഹരികളായി വിഭജിക്കപ്പെടണം.

ക്രിസ്ത്യന്‍ നിയമപ്രകാരം

സ്വത്തിന്റെ മൂന്നിലൊന്ന് ഭര്‍ത്താവിനും മൂന്നില്‍ രണ്ട് ഭാഗം മക്കള്‍ക്കുമായി വീതിക്കപ്പെടും.

ഇന്ത്യയിലെ ക്രിസ്ത്യന്‍ മതവിഭാഗത്തില്‍പ്പെട്ടവരുടെ സ്വത്ത് വീതവെപ്പ് പ്രധാനമായും 1925-ലെ ഇന്ത്യന്‍ പിന്തുടര്‍ച്ചാവകാശ നിയമത്തിലെ (കിറശമി ടൗരരലശൈീി അര,േ 1925) പ്രത്യേക വകുപ്പുകള്‍ പ്രകാരമാണ് നടക്കുന്നത്. ഒരു ക്രിസ്ത്യന്‍ സ്ത്രീയോ പുരുഷനോ ഒസ്യത്ത് (ണശഹഹ) എഴുതാതെ മരിക്കുകയാണെങ്കില്‍ സ്വത്ത് താഴെ പറയുന്ന രീതിയില്‍ വിഭജിക്കപ്പെടും:

1. പങ്കാളിയും മക്കളും ഉണ്ടെങ്കില്‍

മരിച്ച വ്യക്തിയുടെ സ്വത്തിന്റെ മൂന്നിലൊന്ന് (1/3) ഭാഗം ഭര്‍ത്താവിനോ അല്ലെങ്കില്‍ ഭാര്യയ്‌ക്കോ ലഭിക്കും.

ബാക്കിയുള്ള മൂന്നില്‍ രണ്ട് (2/3) ഭാഗം മക്കള്‍ക്കായി തുല്യമായി വീതിച്ചു നല്‍കും. മക്കള്‍ ജീവിച്ചിരിപ്പില്ലെങ്കില്‍ ആ ഓഹരി അവരുടെ മക്കള്‍ക്ക് (പേരക്കുട്ടികള്‍ക്ക്) ലഭിക്കും.

2. മക്കള്‍ ഇല്ലാത്ത സാഹചര്യത്തില്‍

സ്വത്തിന്റെ പകുതി (1/2) ഭാഗം പങ്കാളിക്കും (ഭര്‍ത്താവ്/ഭാര്യ) ബാക്കി പകുതി മരിച്ച വ്യക്തിയുടെ മറ്റ് ബന്ധുക്കള്‍ക്കുമായി (പ്രധാനമായും പിതാവ്, സഹോദരങ്ങള്‍) ലഭിക്കും.

ബന്ധുക്കളായി ആരുമില്ലെങ്കില്‍ മുഴുവന്‍ സ്വത്തും പങ്കാളിക്ക് ലഭിക്കും.

3. ഒസ്യത്ത് ഉണ്ടെങ്കില്‍

മതപരമായ നിയന്ത്രണങ്ങളില്ലാതെ തന്നെ തന്റെ സ്വത്ത് ആര്‍ക്ക് നല്‍കണമെന്ന് തീരുമാനിക്കാന്‍ ഒരു ക്രിസ്ത്യന്‍ വിശ്വാസിക്ക് അവകാശമുണ്ട്. വില്‍പ്പത്രം വഴി മക്കള്‍ക്കോ മറ്റേതെങ്കിലും വ്യക്തിക്കോ സ്ഥാപനത്തിനോ സ്വത്ത് കൈമാറാം.

പ്രധാന പ്രത്യേകതകള്‍:

ലിംഗസമത്വം: ആണ്‍മക്കള്‍ക്കും പെണ്‍മക്കള്‍ക്കും സ്വത്തില്‍ തുല്യ അവകാശമാണുള്ളത്.

മാതാപിതാക്കളുടെ അവകാശം: മക്കളില്ലാതെ ഒരാള്‍ മരിക്കുകയാണെങ്കില്‍ അയാളുടെ സ്വത്തില്‍ പിതാവിന് അവകാശമുണ്ട്. പിതാവ് ജീവിച്ചിരിപ്പില്ലെങ്കില്‍ മാതാവിനും സഹോദരങ്ങള്‍ക്കും തുല്യ ഓഹരികള്‍ ലഭിക്കും.

മരുമക്കൾക്ക് അവകാശം ലഭിക്കുമോ?

പല കുടുംബങ്ങളിലും ഇതാണ് തര്‍ക്കങ്ങള്‍ക്ക് പ്രധാന കാരണമാകാറ്. നിയമപരമായി നോക്കിയാല്‍ അമ്മായിയമ്മയുടെ സ്വത്തില്‍ മരുമക്കള്‍ക്ക് ( മകന്റെ ഭാര്യ) നേരിട്ട് അവകാശമില്ല. എന്നാല്‍ മകന് ലഭിക്കുന്ന ഓഹരിയില്‍ അദ്ദേഹത്തിന്റെ താല്‍പ്പര്യപ്രകാരം ഭാര്യയ്ക്ക് പങ്കുചേരാം.