കല്‍പ്പറ്റ: വയനാട് ഡിസിസി ട്രഷറര്‍ എന്‍ എം വിജയന്റേയും മകന്റേയും ആത്മഹത്യയുമായി ബന്ധപ്പെട്ട ആരോപണങ്ങള്‍ സുല്‍ത്താന്‍ ബത്തേരി ഡിവൈഎസ്പി അന്വേഷിക്കും. ആത്മഹത്യ കേസിനൊപ്പം സാമ്പത്തിക ഇടപാടുകള്‍ സംബന്ധിച്ച ആരോപണങ്ങളും അന്വേഷിക്കും. തെളിവുകള്‍ ലഭിച്ചാല്‍ ചോദ്യം ചെയ്യല്‍ അടക്കമുള്ള നടപടി സ്വീകരിക്കുമെന്നും പൊലീസ് അറിയിച്ചു.
സുല്‍ത്താന്‍ ബത്തേരി അര്‍ബന്‍ ബാങ്ക് നിയമനത്തിലെ പണമിടപാടാണ് എന്‍ എം വിജയന്റേയും മകന്റേയും ആത്മഹത്യയ്ക്ക് കാരണമായതെന്ന ആരോപണമാണ് സിപിഎം ഏരിയ കമ്മിറ്റി ഉയര്‍ത്തുന്നത്. സംഭവവുമായി ബന്ധപ്പെട്ട് സുല്‍ത്താന്‍ബത്തേരി എംഎല്‍എ ഐസി ബാലകൃഷ്ണന്‍ രാജിവെക്കണമെന്ന ആവശ്യം സിപിഎം മുന്നോട്ടുവെയ്ക്കുന്നു. ഐ സി ബാലകൃഷ്ണന്‍ രാജിവെക്കണമെന്നും സംഭവത്തില്‍ സമഗ്ര അന്വേഷണം നടത്തണമെന്നും ആവശ്യപ്പെട്ട് ബത്തേരിയിലെ എംഎല്‍എ ഓഫീസിലേയ്ക്ക് സിപിഎം നാളെ മാര്‍ച്ച് നടത്തും.
തന്റെ കൈകള്‍ ശുദ്ധമാണെന്നും ഇതിന് പിന്നിലുള്ള ഗൂഢാലോചനയില്‍ അന്വേഷണം നടത്തണമെന്നും ആവശ്യപ്പെട്ട് ഐ സി ബാലകൃഷ്ണന്‍ എംഎല്‍എയും രംഗത്തെത്തി. പുറത്തു വന്നത് വ്യാജരേഖയാണെന്നും നിയമനം ആവശ്യപ്പെട്ട് തന്നെ ആരും സമീപിച്ചിട്ടില്ലെന്നും അദ്ദേഹം പറഞ്ഞു. തനിക്കെതിരായ ആരോപണങ്ങളെക്കുറിച്ചും എന്‍ എം വിജയന്റെ ആത്മഹത്യയിലും സമഗ്രാന്വേഷണം ആവശ്യപ്പെട്ട് തിങ്കളാഴ്ച പരാതി നല്‍കുമെന്നും എംഎല്‍എ വ്യക്തമാക്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates