തിരുവനന്തപുരം: മമ്മൂട്ടിയെ സന്ദര്‍ശിച്ചതിന് പിന്നാലെയുണ്ടായ സൈബര്‍ ആക്രമണങ്ങളില്‍ പ്രതികരിച്ച് ഡിവൈഎഫ്‌ഐ സംസ്ഥാന സെക്രട്ടറി എം വിജിന്‍ എംഎല്‍എ. മമ്മൂട്ടിയുടെ ക്ഷണം സ്വീകരിച്ചാണ് അദ്ദേഹത്തെ സന്ദര്‍ശിച്ചതെന്ന് വിജിന്‍ പറഞ്ഞു. വയനാട് ടൗണ്‍ഷിപ്പിലെ സന്ദര്‍ശന സമയത്തുണ്ടായ വിവാദങ്ങളൊക്കെ അന്നേ പറഞ്ഞ് അവസാനിപ്പിച്ചതാണെന്നും വിജിന്‍ അഭിപ്രായപ്പെട്ടു. മമ്മൂട്ടിയെ സന്ദര്‍ശിക്കുന്നതിന്റെ വീഡിയോയും വിജിന്‍ പങ്കുവെച്ചു.

'മലയാളത്തിന്റെ മഹാനടന്‍ മമ്മൂക്കയുടെ ക്ഷണം സ്വീകരിച്ചാണ് സംസ്ഥാനത്തെ ഡിവൈഎഫ്‌ഐ- എസ്എഫ്‌ഐ നേതൃത്വം അദ്ദേഹത്തെ കാണാന്‍ ചെന്നത്. സ്നേഹപൂര്‍വ്വം സ്വീകരിച്ച് ദീര്‍ഘനേരം രാഷ്ട്രീയ സാംസ്‌കാരിക കാര്യങ്ങളില്‍ അഭിപ്രായം പറയുകയും അന്വേഷണങ്ങള്‍ നടത്തുകയുമുണ്ടായി. അദ്ദേഹത്തിന്റെ അനുഭവങ്ങള്‍ മനുഷ്യത്വത്തിന്റെ മഹത്തരമായ നിരീക്ഷണങ്ങള്‍, ജീവിത വീക്ഷണങ്ങള്‍ എല്ലാം പങ്കുവച്ചു കൊണ്ടായിരുന്നു മമ്മുക്കയുടെ സംസാരം', വിജിന്‍ കുറിച്ചു.

'എഴുപത്തഞ്ച് പിന്നിടുന്ന മലയാളത്തിന്റ മഹാപ്രതിഭയോട് തികച്ചും ജനാധിപത്യ പരമായ സംവാദമാണ് ഞങ്ങള്‍ നടത്തിയത്. വയനാട് ടൗണ്‍ഷിപ്പിലെ സന്ദര്‍ശന സമയത്തുണ്ടായ വിവാദങ്ങളൊക്കെ അന്നേ അവസാനിക്കേണ്ടതായിരുന്നു. സഖാവ് റഫീക്കും മമ്മൂട്ടിയും പരസ്പരം സംസാരിച്ചവസാനിപ്പിച്ച ഒരു കാര്യത്തിന്റെ പേരില്‍ വീണ്ടുവിമര്‍ശനമുന്നയിക്കുന്നത് ശരിയല്ല. സമൂഹത്തിലെ വ്യത്യസ്ത തലങ്ങളിലുള്ള വ്യക്തികളോട് യോജിച്ചും വിയോജിച്ചും സംവദിച്ചും കൊണ്ടല്ലാതെ ജനാധിപത്യ പ്രസ്ഥാനങ്ങള്‍ക്ക് മുന്നോട്ട് പോകാനാവില്ല. വിട്ടുവീഴ്ചയില്ലാത്ത രാഷ്ട്രീയ നിലപാടുകള്‍ക്കൊപ്പം മാനുഷിക മൂല്യങ്ങളുമുയര്‍ത്തിപ്പിടിച്ചു വേണം നമുക്ക് മുന്നേറാന്‍', വിജിന്‍ കുറിച്ചു.