കൊച്ചി: സിനിമാ ഷൂട്ടിങ്ങിന് വാഹനങ്ങൾ എത്തിച്ചു നൽകുന്ന യുവാവ് സ്വന്തം കല്യാണവും സിനിമാ സ്റ്റൈലിൽ തന്നെ ആഘോഷമാക്കി. ഹെലികോപ്റ്ററിൽ പറന്നെത്തിയാണ് ഷാമോൻ ഷാജി അലീനയെ നിക്കാഹ് ചെയ്തത്. ഇന്നലെ ഉച്ചയ്ക്ക് കാളിയാർ നമ്പ്യാപറമ്പിൽ കൺവൻഷൻ സെന്ററിൽ ആയിരുന്നു ഇവരുടെ വിവാഹം.

മൂവാറ്റുപുഴ ആരക്കുഴ മ്യാലിൽ പുത്തൻപുര ഷാജിയുടെയും റഷീദയുടെയും മകനാണു ഷാമോൻ. കാളിയാർ ചോലക്കുണ്ടിൽ അലിയുടെയും അനുവിന്റെയും മകൾ ബിഡിഎസ് വിദ്യാർഥിയാണ് വധു അലീന. 

കൊച്ചിയിൽ നിന്നു വാടകയ്ക്കെടുത്ത ഹെലികോപ്റ്റർ മൂവാറ്റുപുഴ ഇലാഹിയ കോളജ് ഗ്രൗണ്ടിൽ എത്തിച്ച് അവിടെ നിന്ന് സുഹൃത്തുക്കൾക്കൊപ്പം കാളിയാർ ഗൾഫ് ഐഡിയൽ സ്കൂളിൽ വന്നിറങ്ങുകയായിരുന്നു. ഒന്നര ലക്ഷം രൂപ നൽകിയാണ് ഹെലികോപ്റ്റർ എത്തിച്ചത്. വിവാഹശേഷം വരനും വധുവും വണ്ണപ്പുറത്തു നിന്നു കാറിൽ മൂവാറ്റുപുഴയിലേക്കു പോയി.

അടുത്തിടെ പുറത്തിറങ്ങിയ കാവൽ ഉൾപ്പെടെ ചില സിനിമകളിൽ ഷാമോൻ അഭിനയിച്ചിട്ടുമുണ്ട്. രഞ്ജി പണിക്കർ, വിഷ്ണു ഉണ്ണിക്കൃഷ്ണൻ, നാദിർഷ, ടിനി ടോം തുടങ്ങിയവർ വിവാഹത്തിന് എത്തിയിരുന്നു.