ഷാർജ: വീട്ടമ്മമാരായ പങ്കാളികൾക്ക് ശമ്പളം നൽകുന്ന 'സ്പൗസ് സാലറി' പദ്ധതിയിലൂടെ ലഭിച്ച പണം കൊണ്ട് സ്വപ്‌ന വാഹനം സ്വന്തമാക്കി മലയാളി വനിത. മലയാളിയായ ഫിജി സുധീർ ആണ് തനിക്ക് ലഭിച്ച ശമ്പളം സ്വന്തമായി കാർ വാങ്ങിയത്. ഷാർജ കേന്ദ്രീകരിച്ച് പ്രവർത്തിക്കുന്ന ഏരീസ് ഗ്രൂപ്പിന്റെ പുതിയ തീരുമാനമാണ് സ്പൗസ് സാലറി എന്ന ആശയത്തിലേക്കെത്തിയത്.  

സ്ഥാപനത്തിലെ ജീവനക്കാരുടെ വീട്ടമ്മമാരായ പങ്കാളികൾക്ക് ശമ്പളം നൽകുന്ന പദ്ധതിയാണ് സ്പൗസ് സാലറി. ഭർത്താക്കൻമാരുടെ ശമ്പളത്തെ ബാധിക്കാതെ പ്രത്യേക ഫണ്ട് വഴിയാണ് വീട്ടമ്മമാരായ പങ്കാളികൾക്ക് ശമ്പളം നൽകുന്നത്. ഏരീസ് ഗ്രൂപ്പ് സിഇഒ സോഹൻ റോയ് ഫെബ്രുവരിയിലാണ് ഈ പദ്ധതിക്ക് തുടക്കമിട്ടത്. ഏരീസ് ഗ്രൂപ്പിന്റെ ഇൻസ്‌പെക്ഷൻ വിഭാഗം മേധാവി സുധീർ ബാദറിന്റെ ഭാര്യയാണ് ഫിജി. 

എമിറേറ്റ്‌സിൽ ജോലി ചെയ്തിരുന്ന ഫിജി മക്കളുണ്ടായതിന് പിന്നാലെയാണ് ജോലി ഉപേക്ഷിച്ചത്. സ്വന്തമായി സമ്പാദിക്കാൻ കഴിയുന്നതിൽ സന്തോഷമുണ്ടെന്നും മക്കളെ സ്‌കൂളിൽ വിടാനും തിരികെ വിളിക്കാനുമൊക്കെ ഇപ്പോൾ സ്വന്തം കാറാണ് ഉപയോ​ഗിക്കുന്നതെന്നും ഫിജി പറ‍ഞ്ഞു.