കുവൈത്തിന്‍റെ വലിയ എണ്ണക്കപ്പലുകളില്‍ ഒന്നായ അല്‍ സാല്‍മിക്ക് നേരെ ഇറാന്‍ ഡ്രോണ്‍ ആക്രമണം നടത്തി. കേരളത്തില്‍ തെരഞ്ഞെടുപ്പ് പ്രചാരണം ഊര്‍ജ്ജിതമായി. ഐപിഎല്ലില്‍ സഞ്ജുവിന്‍റെ ചെന്നൈ സൂപ്പര്‍ കിങ്സിന് തോല്‍വിയോടെ തുടക്കം. ഇന്നത്തെ 5 പ്രധാന വാര്‍ത്തകള്‍ ( Top 5 News Today ) അറിയാം  

കുവൈത്തിന്റെ വലിയ എണ്ണക്കപ്പലുകളില്‍ ഒന്നായ അല്‍ സാല്‍മിക്ക് നേരെ ദുബൈയില്‍ ഇറാന്റെ ഡ്രോണ്‍ ആക്രമണം. ആക്രമണത്തില്‍ കപ്പലില്‍ തീപിടിത്തമുണ്ടായി. കപ്പലില്‍ 24 ജീവനക്കാരാണ് ഉള്ളത്. ഇവര്‍ സുരക്ഷിതരാണ്. എണ്ണച്ചോര്‍ച്ചയ്ക്ക് സാധ്യതയുണ്ടെന്നു അധികൃതര്‍ മുന്നറിയിപ്പ് നല്‍കി.

 നിയമസഭ തെരഞ്ഞെടുപ്പിന്റെ പ്രചാരണം ഊര്‍ജ്ജിതം. കേരളം പോളിങ് ബൂത്തിലേക്ക് എത്താന്‍ ഇനി ഒമ്പതു ദിവസം മാത്രമാണ് ശേഷിക്കുന്നത്. പ്രമുഖ നേതാക്കളെയും താരപ്രചാരകരെയും അണിനിരത്തി ആവേശം വാനോളമുയര്‍ത്തുകയാണ് മുന്നണികള്‍. മലബാറിലെ യോ​ഗങ്ങളിൽ രാഹുൽ​ഗാന്ധിയും തലസ്ഥാനത്തെ യോ​ഗങ്ങളിൽ പിണറായി വിജയനും പങ്കെടുക്കും.

സംസ്ഥാനനിയമസഭാ തെരഞ്ഞെടുപ്പിന്റെ ഭാ​ഗമായി വീടുകളിലെ വോട്ടെടുപ്പിനു തുടക്കമായി. സംസ്ഥാനത്തെ 140 മണ്ഡലങ്ങളിലേയും 85 വയസ് പിന്നിട്ടവരും 40 ശതമാനത്തിൽ അധികം ഭിന്നശേഷിയുള്ളവരുമാണ് വോട്ട് ചെയ്തു തുടങ്ങിയത്. ഇന്നലെയായിരുന്നു ആദ്യ വോട്ടെടുപ്പ് ദിനം. ഇന്നലെ 10,922 പേർ വോട്ട് രേഖപ്പെടുത്തി.

തമിഴക വെട്രി കഴകം എന്ന പാര്‍ട്ടി നേതാവ് വിജയ് യുടെ സ്വത്ത് വിവരങ്ങള്‍ പുറത്ത്. നാമനിര്‍ദേശ പത്രികയ്ക്ക് ഒപ്പം സമര്‍പ്പിച്ച സത്യവാങ് മൂലം പ്രകാരം ഏകദേശം 404.58 കോടി രൂപയുടെ ജംഗമ ആസ്തികളാണ് വിജയ്ക്കുള്ളത്. വിവിധ ബാങ്ക് അക്കൗണ്ടുകളിലായി 220 കോടിയോളം രൂപയും വിജയ്ക്ക് സ്വന്തമായുണ്ട്. കഴിഞ്ഞ 5 വര്‍ഷത്തെ വിജയ്‌യുടെ വരുമാനം 734.4 കോടി രൂപയാണെന്നും സത്യവാങ്മൂലത്തിലുണ്ട്.

ഐപിഎല്ലില്‍ ചെന്നൈ സൂപ്പര്‍ കിങ്‌സിനെതിരായ ആദ്യ പോരാട്ടത്തില്‍ അനായസ വിജയവുമായി രാജസ്ഥാന്‍ റോയല്‍സ്. 8 വിക്കറ്റിന്റെ തകര്‍പ്പന്‍ ജയമാണ് രാജസ്ഥാൻ സ്വന്തമാക്കിയത്. 15കാരൻ വൈഭവ് സൂര്യവംശി അർധസെഞ്ച്വറി നേടി. ചെന്നൈയ്ക്കു വേണ്ടി ആദ്യമായി കളത്തിലിറങ്ങിയ സഞ്ജു ആറു റൺസെടുത്ത് പുറത്തായി.