ഉഡുപ്പി: നദിയില്‍ ചാടി ആത്മഹത്യക്ക് ശ്രമിച്ച യുവതിയെ മുതല കടിച്ചു. നിലവിളി കേട്ട് എത്തിയ നാട്ടുകാരാണ് യുവതിയെ രക്ഷിച്ചത്. ബുധനാഴ്ച രാത്രി കുക്കെ സുബ്രഹ്മണ്യ ക്ഷേത്രത്തിനടുത്തുള്ള കുമാരധാര പുഴയുടെ പാലത്തില്‍നിന്നാണ് ഉഡുപ്പി സ്വദേശിയായ യുവതി ചാടിയത്. ഉടനെ മുതല ആക്രമിക്കുകയായിരുന്നു. കുടുംബ പ്രശ്‌നമാണ് ആത്മഹത്യാശ്രമത്തിന് പിന്നിലെന്ന് പൊലീസ് പറഞ്ഞു.

മുഖത്തും കൈകള്‍ക്കും കടിയേറ്റ യുവതി നിലവിളിച്ചതോടെ സമീപത്തെ ലോഡ്ജില്‍നിന്നും പുഴക്കരയിലെ വീടുകളില്‍നിന്നും ആളുകള്‍ എത്തി രക്ഷപ്പെടുത്തുകയായിരുന്നു. സുബ്രഹ്മണ്യ പാലീസ് എത്തി യുവതിയെ സമീപത്തെ ആശുപത്രിയില്‍ എത്തിക്കുകയായിരുന്നു.

കുടുംബപ്രശ്‌നത്തെ തുടര്‍ന്ന് ഉഡുപ്പിയിലെ വീട് വിട്ടിറങ്ങി കുക്കെ സുബ്രഹ്മണ്യക്ഷേത്രത്തില്‍ കഴിയാനായി എത്തിയതാണെന്ന് യുവതി മൊഴിനല്‍കി. ആശുപത്രിയില്‍ അസ്വസ്ഥത പ്രകടിപ്പിച്ച യുവതിയെ കൗണ്‍സലിങ്ങിനുശേഷം ബന്ധുക്കളെ വിളിച്ചുവരുത്തി ഒപ്പം വിട്ടു. സംഭവത്തില്‍ പരാതിയൊന്നും രജിസ്റ്റര്‍ ചെയ്തിട്ടില്ല. കുടുംബത്തിന്റെ അഭ്യര്‍ത്ഥന മാനിച്ച് സ്ത്രീയുടെ വിവരങ്ങള്‍ പൊലീസ് പുറത്തുവിട്ടിട്ടില്ല.