വെല്ലിങ്ൻ: ഇന്ത്യ എ ടീമും ന്യൂസിലൻഡ് എ ടീമും തമ്മിലുള്ള മൂന്നാമത്തെയും അവസാനത്തെയും അനൗദ്യോഗിക ടെസ്റ്റ് മത്സരം (ചതുർദിനം) നാളെ തുടങ്ങും. പരിക്കുമൂലം ഋഷഭ് പന്ത് മൂന്നാം അനൗദ്യോഗിക ടെസ്റ്റിലും ഇന്ത്യക്കായി കളിക്കില്ല. ടെസ്റ്റ് പരമ്പരക്ക് മുന്നോടിയായാണ് പോരാട്ടം.
വരിയെല്ലിനേറ്റ പരിക്കിനെ തുടർന്ന് ബംഗളൂരുവിലെ ബിസിസിഐ സെന്‍റർ ഓഫ് എക്സലൻസിൽ തുടരുന്ന പന്ത് ബാറ്റിങ്, കീപ്പിങ് പരിശീലനം പുനരാരംഭിച്ചെങ്കിലും ഫിറ്റ്നസ് ടെസ്റ്റ് മുഴുവൻ പാസായില്ല. ഇതോടെയാണ് മൂന്നാം മത്സരത്തില്‍ നിന്നു താരത്തെ ഒഴിവാക്കിയത്.
ടെസ്റ്റ് പരമ്പരക്ക് മുൻപ് ഫിറ്റ്നസ് ടെസ്റ്റ് വിജയിച്ചില്ലെങ്കില്‍ പന്തിന് ന്യൂസിലന്‍ഡിനെതിരായ ടെസ്റ്റ് പരമ്പര നഷ്ടമാവും. പന്ത് പൂർണ കായികക്ഷമത കൈവരിച്ചില്ലെങ്കിൽ വിക്കറ്റ് കീപ്പറായി ധ്രുവ് ജുറെൽ തന്നെ ടെസ്റ്റ് ടീമിൽ തുടരുമെന്നാണ് സൂചന. ലിങ്കണിൽ നടക്കുന്ന മൂന്നാം മത്സരത്തിൽ പന്തിന് പകരക്കാരനായി ടി20 ടീം വൈസ് ക്യാപ്റ്റൻ തിലക് വർമ്മ ഇന്ത്യ എ ടീമിനൊപ്പം ചേർന്നിട്ടുണ്ട്.
ടെസ്റ്റ് പരമ്പരയ്ക്ക് മുന്നോടിയായി മത്സര പരിചയം ലക്ഷ്യമിട്ട് പേസര്‍ ജസ്പ്രിത് ബുംറയും ഓൾറൗണ്ടർ രവീന്ദ്ര ജഡേജ എന്നിവർ ഇന്ത്യ എ ടീമിനായി നാളെ കളിക്കാനിറങ്ങും. പേസ് ബൗളിങ് ഓൾറൗണ്ടർ നിതീഷ് കുമാർ റെഡ്ഡിയും ടീമിലുണ്ട്. മൂന്നാം മത്സരത്തിലും ധ്രുവ് ജുറെലാണ് ഇന്ത്യ എ ടീമിനെ നയിക്കുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
